Nikhat cu Vanzang van parih a zam rero lai ah thlisia nasazet in a hrang ih mipi passenger pawl cu tih le khur in an an um. Cu laiah nauhak nu te cu ca siar phah in thinuam zet le hni phah ten a rak tho hiah hi. Vamzam mawngtu Pilot cun Emergency in Vanzam kan ṭum ding ti ah mipi passenger pawl thu a vawn than. Pathian zangfahnak in Vanzam cu tluangten a tum thei ih zo hman hliam le thi an um lo. Nauhak nu te kiangih totu pakhat pa cun mangbang zetin Nauhak nu hnenah, "Khat tluk thlisia a hrang ih thi ding maw nung ding hman kan thei awk lo lai ah ziangah thinnuam zetin na um thei," tiah a vawn sut. Nauhak nu te cun, "Vanzam mawngtu Pilot hi ka pa a si ih Vamzam sungih to tu pawl hmuahhmuah hnak in ka dam suak le ka him nak ding duhbik tu tla a si ruangah ka pa in a theih tawp in ka him nak ding a hawl ding ti ka thei," tiah a let. Zumtu kan nunah harsatnak kan tawn caan ah Vanzam totu mipi Passenger pawl bangin kan thinhar in kan khawruah a har cuahco caan tampi a um theu. Leitlun nun hi a har in ka ning hluahhlo ti ih beidawng men tla a ol zet.
Hi thuanthu tawite ih Nauhak nute bangin Kan Pa Pathian kan zum ngam ih Bawipa in kan hrangah a ṭha bik rem a ruat ringring a si ti in hnangam zetin kan um cun Bawipa a cangvai tengteng ding . Bawipa rinsan ih zumnak thawn hmainawr ngamtu si dingah Pathian in thlasuah in pek cio hram seh. AMEN
Ref: Gaur Gopal Das
