C.Ronaldo ih hlawhtlinnak tampi sungin ka duh zet mi pawl cu:
1. A sinak a hniglh dahlo
Millionaire a si nan a interview nak ih an sut tinten a nauhak lai thu a sim ringring theu ih, farah zet ih ziang a neilo lai a sim tel ringring theu.
Mi tampi hlawhtlinnak kan ngah deuh caan ah thlasuah in petu Pathian lawng silo kan unau sungkhat tiang hman kan hniglh pang theu. Kan sinak le a hram kan rak thawk nak te kha hniglh dah hlah uh si. Cui kan hram thawk nak cun ziangvek ih hlawhtling kan va si hman ah tangdornak in zirh ding a si.
2. Mi ih relsiatnak cu a cah nak
C. Ronaldo cu Messi hnak in relsiat camriam tu a nei tam sawn ti seh la a sual lo ding. Asinan cui relsiatnak pawl cu a cah nak sawn ah a hmang ih a ṭang sinsin. Bawhlung puai an sung tinten a sim theu mi cu hi hnak cak sawn in ka kirsal ding (We will come back stronger) ti a si theu.
Minung kan si ruangah kan tlaksamnak a um ringring ding. Asinan cui tlaksamnak ruangih relsiat le doralnak kan tong mi pawl cu ṭhazang in petu le in tungding sal tu ding ih kan hman thiam a poi mawh zet. Kan tisualnak pawl cu kan hmailam hrang foundation ah hmang tahrat in caksawn ih kirsal tu si kan tul.
3. Mi thawn a nun a tahṭhim dah lo
C. Ronaldo cu midang zo nun thawn hman a tahṭhim dahlo. A theihtawp in a zuam ih thiambik le sangbik si duh ringring mizia a nei. Kum 37 a si zo nan Ṭhalai tamtak hnak ih fit in taksa mawi neitu a si ringring thei lai ih tuni tiang nehnak co ding duh ringring le zuam ringirng tu a si.
Midang zoh in thil kan tuah sungah cun kan ṭhangso theilo ding. Ka zoh mipa/minu a tluksiat ve ten kan thlun cih ding a fiang. Na nun le mi nun na tahṭhim sungah cun na lungawi dah lo ding. Mi muah an cuti kha ti na ti ringring ding ih na hmasawn nak a lo dodal lan thei.
#Note:
Messi ih kumkhat hlawh cu - 41 million USD a si
C. Ronaldo ih kumkhat hlawh cu - 62 million GBP (76.5 million USD)