A thaizing lawngah Leah a si, ti kha Jakob in a thei. Cutikah Jakob in Laban cu, “Ka parah zianghrangah hivek na tuah? Rachel co dingah na hna ka òuan a si lo maw? Ziangahso hitiin i bum?” tiah a ti.
Semtirnak 27:1ff, kan zoh asile Isaak in a fapa Esau cu thlasuah pek dingah hramlak ah sa va hawl in a pai duh zawng in thawte in suang i rak pe dingah a fial. Cui thu cu Rebekka in a thei tikah Jakob hnenah a u Esau vek ih thuam aw in thlasuah dil dingah a fial. Jakob cu a nu fial vekin a tuah ih hlawhlting in thlasuahnak cu a ngah (Sem 27:35).
A u Esau ih thinhengnak cun a pa Isaak a thih hnuah a nau cu that dingin khua a ruat (Sem 27"41). Asinan cui a khawruah cu a nu Rebekka in a thei tikah Jakob cu a tapa Laban umnak Mesopotamia ram ah a tlan ter.
Jakob cu a pu Laban ih fanu Rachel nei duh ruangah kum 7 rori a pu a rian nan Rachel nei ngah loin a theihlo sungah a pu Laban ih bumnak a tuar ih Leah sawn a rak nei riai (Sem 29:23). Cuticun, Jakob cu Rachel nei dingah kum 7 rori a pu Laban ih hna a ṭuan sak lala hnuah a duhdawt zetmi Rachel cu a nei theisal.
Hitawk ih kan hmuh thei mi cu Bumtu kha bumin a um ve tihi a si (Gal 6:7). Curuangah Zumtu kan ralring a poimawh zet. Ca Thianghlim in fiang zet ih in simmi cu kan tuh mi vek cetci in kan at sal ding tihi a si. Thilṭha kan tuah tikah kan nun ah thilṭha in in thlun ve ih, mi ṭhat lo nak ding lamzin kan hawl tik ah kan mah le kan mah kan siatsuah aw rero a si ti kan thei a ṭul.
Thilṭha tuah ih Midang hrang thlasuah phurtu si dingin Pathian in in bawm cio hram seh.