John 21:15-17
15 An ei ṭheh hnuah Jesuh in Simon Piter cu, “Johan fapa Simon, hi midang pawl ih in duhdawt hnakin nang in i duhdaw sawn maw?” tiah a sut. Simon in, “A si Bawipa , ka lo duhdawt cu na thei,” tiah a ti. Jesuh in a hnenah, “Ka tuunote pawl kilkhawi aw,” tiah a ti. 16 A vei hnihnak ah Jesuh in, “Johan fapa Simon, i duhdaw maw,” tiah a sutsal.
Simon in, “A siBawipa , ka lo duhdawt cu na thei,” tiah a let.
Jesuh in, “Ka tuu pawl kilkhawi aw,” tiah a ti. 17 Jesuh in, “Johan fapa Simon, i duhdaw maw?” tiah vei thumnak a sut lala.
Cutiin vei thum tiang Jesuh in, “I duhdaw maw?” tiih a sut ruangah Piter cu a riah a sia ih Jesuh hnen ahcun, “Bawipa , nang cun ziang hmuahhmuah na thei ṭheh. Ka lo duhdawt ti khal na thei ṭheh ko a sisi!” tiah a ti. Cule Jesuh in, “Ka tuu pawl kilkhawi aw.
Introduction
Simon Peter cu zo a si?
Galile ram bethsaida khawte ih ummi Jonah or Jona ih fapa a si ih Jesuh in a duhdawt zetmi a dungtlungtu hleice ah a tel ve mi a si. Jesuh in a duhdawt hleice mi a dungthlun tu pawl cu Peter, James le John tla an si.
Simon Peter tihcan cu ziang a si?
Simon tihcan cu "Ngai" (Listen)
Peter tihcan cu "Lungpi" (Rock).
Greek ṭong in "Πέτρος" tin an hmang, "πέτρα" ti cu Lungto (Stone) tinak a si ih Greek cun lung fate rel nak ah an hmang.
Simon Peter hi ziangvek mi a si?
Simon Peter cu thinrang le ruah hmaisa loih thusim hmang a si.
Simon Peter ih hnaṭuan cu ziang a si?
Simon Peter cu nga hawl/nga kai ih nu le fa cawmtu a si.
Pathian in zumtu kan nitin nunah "I duhdawt sawn maw" tiih Simon Peter vekin in sut ringring ṭheu. Asinan, Bawipa ka lo duhdawt kan ti ko nan ziangtin kan duhdawt tihi ruah ding tampi a um. Jesuh in Peter cu I duhdawt sawn maw tiah a sut tikah Peter cun ka lo duhdawt a ti ko nan Jesuh in veithum tiang rori a sut nolhsal a si kha. Jesuh dungthluntu le a duhdawt ngaingai tu ih nun daan kan zoh tlang pei.
1. Mah le mah vuiliam nun a si (Matthai 16:24).
A. Mai duhnak tlansan nun
1 Peter 2:11
Ka duhdawtmi ka rualle tla, hi leilung tlunah mikhual le raltlaanmi bangtuk nan si ih nan hnenah zaangfah ka lo dil a si. Tlarau thawn a ral aw ringringmi taksa hiarnak in lo neh hram hlahseh.
B. Pathian hruainak lawng ring nun
Thufim 3:5-6
5 Bawipa cu na thinlung zate in rinsan aw. Nangmah ih ruahnak le theihnak kha rinsan aw hlah.
6 Na tuah mi kipah Pathian cu thei ringring awla, Amah in lamzin dik a lo hmuh ding a si.
2. Pathian lawng tlaihsan nun a si.
A. A biak inn ngai na nun
Tirhthlah 3:8
A hung tho lohli ih amahte in a ding ih a feh thei. Cule Piter le Johan hnenah Biakinn sungah a lut ve. A feh, a khir a zuang ih Pathian a thangṭhat.
B. Pathian thangṭhat nuam ti nun
Tirhthlah 3:9-10
9 Cutiih a feh thei le Pathian a thangṭhat cu mipi in an hmu ih, 10 Kotka mawi ah tangka dil in a um ringringtu a si kha an theih tikah a parih thil a thlengmi ruangah an khuaruah a har ih an mang a bang ngaingai.
3. Duhdawt let hna thiam nun a si.
A. Pathian in kan nun hloral ding in siang hrimhrim lo
John 3:16
Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding.
B. Nitin sualsir nun neih kan ṭul
1 Korin 15:31
U le nau tla, nitin tein ka thi a si. Khrih Jesuh thawn kan pehzom awknak thawngin nanmah cu ka porh awknak nan si ih hiti ih ka ṭong theinak khal hi a si.