NUI DUHDAWTNAK

KA NUI DUHDAWTNAK

Ka nu um hlah sehla, Ka semlo ding...

Ka damṭha ih himten ka suak thei nak dingah

Ka nu cu si khakha le a duh lomi rawl tiang a hramhram in a ei theu…

Ka nui pum sungih thla 9 ka um sungah,
Ziangtluk in saw Ka nu a rak rethei ding ka ruat banlo…

A thisen thawn in hring hnuah,
A hnawiti thlum thawn I cawm…

Ka hrin niih ka hrang a tuarnak hliam le a thisen,
Ka damsung ka rul thei ding maw?

Ka suahni ah a natnak le a lungawinak cem in a mithli a luang…

A fale kan ih-hmut thawt theinak dingah,
Zanvaar a meng zan pawl kha ka siar cawk fawnlo.

A fale kan rilrawng ding phan ruangah,
Amah hman ei lon eiding in pek kha a duhdawtnak ruangah a si…

A fale mi kan bang ve theinak dingah,
A ṭhazang in a celhlo nan a zuam rero mi a thi le tha…

Kan ṭap caan ah duhdawtnak thawn in ṭahpi…

Neih mi hmuah ui loin fale ro sunglawi fimthiamnak in pek,
Kan beidong caan ih hnemtu ṭhabik le bawmtu ṭhabik ka "NU"…

Fale sualnak le tlinlonak ruangah,
A mithli tlak in cung Pathian hnen thla a cam…

“NU” ka lo duhdawtnak kan biazai te thawn ka lo hlan…
Ka nunnak hrang na nunnak thap in i hring…
Ka it theilo caan ah mitkuh phah ten I awinak na ṭaanghlum…
Nisa tuar ding phangah, In hlum na ṭaangdai nuam ah…
Na thazaang in a tlinlo nan, Mi ka bangnak dingah na thi le tha na pek…
Na fale hrang a char mi na khuk…
Na fale hrang a kak mi na kut...

Na fale hrang a fawr mi na mitthli...

Na fala hrang na pek mi na mawinak...

Ka damsung ka rulh theilo ding mi ka "NU" duhdawtnak...
Cungnung mangbawi kan Pathian in nunsaunak lo pe hramseh.
Ka lo duhdawt ka "NU"…