PATHIAN HNAṬUAN DAAN

Khuahlan lai ah Pathian ṭihzah zet le duhdawtzet tu mi pakhat a rak um. Thlacam a teima zet ih a zumnak tla a tum zet fawn. Nikhat cu nasa zetin ruah a sur ciamco ih, Tidai a tam tuk ruangah an khua cu Ti a lik thawk rero. Cu-laiah Pathian ṭihzah zet pa cu Bawmnak dil in thla a rak cam rero. Cutikah a rualpi pawl an ra ih, ka rual Tidai a ṭhang vivo ruangah himnak hmun pan in kan tlan lohli a ṭul tiah ah tlan ve dingin an rak ko. Asinan, a nih cun kei cu Pathian in in runsuak ding nan mahten rak feh uh tiah a ti. Tidai cu a ṭhang vivo ih el tiang rori a ra thleng. Cui hnu reilo te ah Lawngte thawn mi pakhat a ra lala ih na rualpi pawl in minung run ding a um lai tiah in sim ih bawm dingah ka ra ho khaw tiah a sim. Asinan, Pathian zum le ṭihzah zettu pa cun in bawm duhhlah Pathian in in bawm ding tiah a rak hnawl lala. Tidai cu a sang vivo ih hngawng tiang a rak thleng thlang. Cui hnu reilo te ah Helicopter thawn Bawmtu ding an ra thleng lala ih nangmah bawm dingah kan ra ho khaw, Helicopter parah ra kai aw tiah an vawn au. Asinan, cu pan cun Pathian in in bawm ding tiah a el lala. Thla a cam rero nan Tidai a ṭhang vivo ih a sang vivo ruangah thaw hman ṭhaten thaw thei nawn loin a nunnak a liam ta.
Vanram a vawn thleng ih, Pathian hnenah,"Bawipa ziangah kha tluk rori bawmnak dil in thla kan cam ih in bawm lo tiah," vuivai phah in a sut.

Pathian cun,"Ka fapa nangmah lo bawm dingah veithum rori kan ra kha," tiah a rak let.
Cu pa cun,"Bawipa in bawm dingih na rat lam ka theilo lawlaw," tiah a let ve.
Pathian cun,
"A veikhatnak ah na rualpi pawl hmangin lo bawm/runsuak ka tum nan, nang cun na rak hnawl.
A veihnihnak ah lawngte mawngtu hmangin lo bawm/runsuak ka tum nan, nang cun in rak hnawl lala.
A veithumnak ah Helicopter hmangin lo bawm/runsuak ka tum nan, nang cun in rak hnawl lala a si kha." tiah a let.

Caan tampi Pathian hnaṭuan daan theithiam loin, kan beisei vekin Pathian hna a ṭuan lo caan ah kan vuivai pang ṭheu. Pathian kutcak lang dingah na unau, na rualpi, asilole na ral pawl hman Pathian in a hmang thei.

Siangphahrang Saul in David thah a tum laiah
- David luatnak dingah a rual Jonathan (Jonathan cu Saul Siangphahrang ih fapa) Pathian in a hmang (1 Samuel 23:16–18).
Nehemiah cu Persia ram ah Sal a si nan
- Persia Siangphahrang Artaxerxes hmangin Jerusalem kulh hruang a saksal thei (Nehemiah 2: 8b-9).
Syria Ralbawi Naaman pharnat ih a damlo laiah
- Judah ram ihsin an hruai mi sal nute hmangin damnak a ngah sal (2 Siangphahrang 5:1ff).

Pathian hnaṭuan daan thei thiamtu si dingin Pathian in in bawm hram seh.