PENTECOST IH SULAM

Tirhthlah 2:1-2

¹ Pentikos ni a thlen tikah zumtu hmuahhmuah cu hmunkhat ah an um. ² Hmakhat teah van ihsin thlipi hrang bangin thawmvang a rung ih an tonak khaan cu a khat ṭheh. 

John 15:26-27 sungah Jesuh cun a dung thluntu pawl hnenah, "Nan umnak ding hmun ka rem cia dingih nan mah lo bawmtu dingah thiangthlarau pek nan si ding," tiah a sim.

Jesuh cu a thawhsal hnuah ni 40 rori a dungthluntu pawl thawn an ei an in tlangih vangah lakso a si kha. Cuihnuah a dungthluntu pawl cun Jesuh ih rak tiam le simmi vekin Jerusalem ah thlacamnak thawn thiangthlarau an rak hngah. Pentikos ni a tlen tikah Thlarau Thianghlim cu meisa vekin a rung thlengih dungthluntu pawl umnak khan cu a khat ṭheh. Cui thlarua thianghlim ruangah ṭong dangdang in an ṭongih ralṭhatnak in an khat tiah Bible Ca thianghlim in in sim.

Pentikos timi cafang cu Greek ṭong ihsin lak mi a si ih, Greek in Πεντηκοστή (Pentikosti) a sulam cun 50 tinak a si. Jesuh thawhsal a si hnu ni 50 nak tican a si ih Whitsun tiin tla khaw a si ṭheu. Kan Bawipa Jesuh cu a dungthluntu pawl thawn ni 40 sung an tlangleng hnuah van ah lakso a si ih, a dungthluntu pawl cu Jerusalem ah thlacamnak thawn ni 10 rori an rak hngak ve. Curuangah Jesuh thawhsal a si hnu ni 50 tiin Bible hrilhfiahnak le cangantu pawl cun an tarlaang a si.