Asinan i run let ih,"Ka zangfahnak cu na hrangah a tawk a si; ziangahtile na ṭoonṭiah caan hi ka cah bik caan a si," a ti. Curuangah Khrih cahnak le humhimnak cu ka hnenih a umnak dingah ka ṭontaihnak khalah hin hmaihngal zetin ka lung a awi.
Ka tlawngkai lai Greek subject in zirhtu Sir Moody Lalrawngbawla cun a Facebook ah hitin a rak post dah. Naute cu a suak veten Nurse pawl in aṭap auaw an theilo a si le, a dam ṭha ti theihnak dingah linglet zawngin an khai si maw, dimten a beng theu. Naute aṭap an thei veten a dam ṭha a si tiin a hringtu nu ṭangah an pe theu asi.
Ka hringnunah harsatnak kan tawn caan tampi a rak um theu. Innsangah, Pumpak nunah, Rualpi lakah, kan hnatuannak ah si maw remawklonak tete a rak um caan a um ṭheu. Jeremiah 33:3 sungah “I ko awlo ka lo sawn ding” tiin Pa Pathian in thutiam in pek. Joshua cun Ai khua neh lawn ralkap tampi in an nunnak an liam a hmuh tikah sualsir in ziangmi saw ka tuah sual tiin Bawipa hmaiah khukbil tahratin ngaithiam a dil. Caan tampi ah Job vekin Pathian ih hniksaknak, silole Pathian duhlomi kan tuah pang caanah a mi le fa pawl nunsimnak ka tawng ṭheu. Nemten in ko caan a um vekin nemten kawhnak thei thiam loin kan lung a hak pang a si ahcun, natzet in tla kawh kan si ṭheu. Nitin kan nunnak ah Pathian in thilzir dingin pek ringring ṭheu.
Milai lamah beisei ding nei lo ih harsa vansanglam ih kan um lai caan khal ah Pathian in in thlahthlam dah lo. Suahkeh kezeng pa cu Pu le Pi sualnak ruangah si loin, Pathian hming sunlawihnak dingah a hmang sawn a si kha. Nitin kan tawnmi harsatnak le buainak pawl in Pathian in naihter sinsin ih, a mah lawng rinsan thiamnak in pe camcim hram seh.