Milai zovek khal laar cu kan duh cio ding zum a um, cule "Laar" meen hi sual a si lo hrimhrim. Asinan Laar Duhnak (The spirit of popularity) ruangih nun daan, tuah daan tivek thleng ciamco le ti awter ciamco hi Pathian thuthawn cun a kalh rori a si. Ziangahtile Pathian thu cun "Amah le amah a uang awtu cu minauta ah tuah a si dingih, lungnem tangdor ih a umtu cu hmaizahnak ngahtu upa ah a cang ding,” tiah a ti (Luke 14:11). Pathian hnaṭuannak ah le pumpak hnaṭuannak khalah "Laar" duh pawl ih mizia cu:
- Dinhmun le sinak ngah ding beiseinak an nei ringring.
- Covo ngah dingah tumtahnak thup an nei ringring.
- An sinak, zirnak le tuahmi pawl rel an uar ṭheu.
- Anmah hi ziangkim ah "Bik" an ti aw ringring.
- A lenglam lannak le midang hmuh ih hnaṭuan hi an uar.
- Hmin lang ding hi an ruat thupi emem ṭheu.
- Ziangkim ah tel vivo, hrolhawk vivo an tum ringring.
- Anmah le anmah "hmat" anpe aw ringring.
- A lem ih nun daan, mi biak daan le ṭuan daan an thiam ngaingai.
- Anmah le anmah an thehlar-awk, midang ih theih le hmuh an tumtah ringring.
Asinan, an sung muril ah an sinak le an tumtahmi pawl an thei aw keukeu fawn. Bawipa kan Pathian cun a mai khaisang mi pawl cu a thlasuah ih asinan mi puarthau, mah le mah sibik ih ruat aw pawl cu mi nauta ah a tuah ṭheu.
Pathian kuttak tangih tangdor le thinsau ten Pathian a riantu le thinlung tak ten a ram le a felnak a hawltu pawl lawng Pathian thinlung tongtu an si ih, Pathian ih cawisannak cotu ding pawl tla an si.
Ref: Rev. Joel Lalcungmang, "Nun Thlalang: 1st Edition", (Kalaymyo, 2020), p. 49.