Pathian hnaṭuantu riahsiatter a ṭihnung ngainga. Ziangahtile Bible Ca Thianghlim in Pathian ih a hrilmi a hnaṭuantu dodal le riahsiatter ruangih a thlenter mi pawl ṭih a nung zia in sim.
1. Noah le a innsang cu mi-aa tiah kawh an si
Pathian in Noah hnenah milai sualralnak ruangih leilung a kolh ding thu le rundamnak an co theinak dingah lawng a sakter. Pathian thungai in Noah le a innsang cun lawngpi cu an sak rero laiah an khaw mi le sa pawl cun atthlak ah ruat in mi-aa sungkua tiah zawmtiah an si. Asinan, Pathian thutiamnak a thlen ni ah mi-aa tiih Noah a kotu pawl cun an luatnak hrang an au rero nan lawng sangka ong a si nawnlo.
Pathian hrilmi a hnaṭuantu ih simmi thungailo le ziangsiarlo ih mi-aa thilthuahmi vek men ih an ngaisak lo nak ruangah an siarawknak cu ngaihsak an si nawn lo.
2. Moses a thangsia tu Miriam le Aaron
Miriam le Aaron cun Moses in Kush nunau a ṭhit ruangah an thangsia (Mipum Siarnak 12:1). Curuangah Pathian a mah rori in Miriam le Aaron cu a ko hai ih "Ziangah so ka milai a simi Moses cu nan thangsiat ngam" tiah a ti (Mipum Siarnak 12:8). Cule Bawipa in a fehsan veten Miriam taksa parah phaarnat in a khat ih a vun tla cu vur bangin a raang thluh ti kan hmu thei (Mipun Siarnak 12:10)
Pathian hnaṭuantu pawl na bawm theilo hmanah thangsia hrimhrim hlah. Bawipa a mah rori ih a hrilmi pawl cun a kilveng ih a humhim ringring. A thangsiattu pawl tlunah natnak siarva a thlenter ṭheu.
3. Elisha a hmuhsuamtu nauhak pawl
Elisha cu Jerikho ihsin a suak ih Bethel lamih a feh lai ah khua pakhat sungin mipa nauhak an ra suak ih hnihsuak sainak ah an hmang ih,"Feh aw, lu thlung kolh pa, feh aw," tiah an auh. Cui nauhak pawl ih auhnak cun Elisha a thin a ṭeuter ih Pathian hmin in a cam hai. Cuhnu reilo te ah Hramlak in savom pinu pahnih an hung suak ih mipa nauhak sawmli le pahnih cu an bauhthlek thluh (2 Siangphahrang 2:23-24).
Pathian in a hnaṭuantu a mi le fa pawl hmuhsuam a duh lo lawlaw ti a fiang. Mibang an si ah maw, mivek ih santlailo an si hmanah hmuhsuam hrimhrim ding an silo. An thin na natter pang asile, na parah siatnak nasazet a thleng pang thei.
4. Mikhal cun a pasal Siangphahrang David a soisel
David siangphahrang cu Thukam Kuang Jerusalem khua a hlenpi tik ah a lungawi tuk ih a zuang a khir a laam ih Bawipa a thangṭhat. Asinan, Saul ih fanu a si mi David Siangphahrang ih nupi Mikhal cun a soisel ih tihrim phah in "Tuih sun Israel siangpahrang cu a hmin a thang zet ual! A hnaṭuantu fala pawl hmaiah mi-aa bangin puan paate thawn ningzah hman thiam lo in a laam ciamco kha!" tiah a rak ti.
Pathian in a hrilmi a mi le fa soisel le tihrim a duh lo zia cu Mikhal nun ah a langter ih Mikhal cun a thih tiang faate a nei lo tiah Bible Ca Thianghlim in in sim.
5. Daniel zuarthlaitu a rual le pawl
Daniel cu Babylon ram ah saal si dingah hruai a si nan Pathian a ṭihzah ih ruangah Pathian in a khaisang ih hleiah Siangphahrang ih duh hlawh zetmi ah a cang. A rualpi/ṭuanpi pawl in an iksiknak ruangah phiaraw tahrat in a tlaksiatnak ding khua an khaang. Asinan, Pathian in Daniel hrangih an remruatmi Kiosa puksung ihsin a runsuak ih a zuarthliatu a rualpi le innsang riangri cui Kiosa puk sungah thlak an si kha (Daniel 6:1ff).
Curuangah Pathian ih hriak a thih mi a hnaṭuantu zovek le ziangvek te an si hmanah ṭongkam in siseh, zuarthlainak in siseh, thangsiatnak in siseh dodaltu si hrimhrim hlah uhsi. Ziangahtile Pathian ih a hril mi a hnaṭuantu pawl cu Pathian in a kilveng ih a ṭha mi thil na tuah ah siseh, a sia mi thil na tuah ah siseh, na tuahmi vek cekci in Pathian in a lo thungrul ve ding ti hngilh hrimhrim hlah.