Hruaitu diktak timi cu sinak le dinhmun sang lam a si lo. Hruaitu sinak diktak cu midang sawmdol, pehzomnak ṭha tuah le midang zohṭhimtlak ih umnak sawn hi a si. Hruaitu ṭha diktak cu thil tampi a tuahsuak theitu le a tuahsuak ngaingai tu pawlkomnak sersuak hi a si. Hruaitu diktak cun midang thiamnak pawl hmangsuak thei dingih bawm le hmailam caan ah hruaitu ṭha si ve dingih sersuak hi a si sawn. John C. Maxwell cun Hruaitu sinak dot (5) in a ngan ih a dotdot ten hruaitu an lungput tla a simfiang bet. Asinan, a zaten cun ka rawn ngan lo dingih a thulu le simfiangnak vial ka rawn tarlang ding.
1. Sinak (Position - Rights)
Dot (1) nak ahcun Mipi pawl in hruaitu an si ih thlun ding a si ko tiah sinak zoh ih thlun mi an si tlangpi.
2. Lungkimnak (Permission - Relationships)
Dot (2) nak ahcun mipi pawl thawn pehtlaihnak a um tikah an duhhrilnak thawn hruaitu an thlun.
3. Tuahnak (Production - Results)
Dot (3) nak ahcun hruaitu pakhat ih thil a tuahsuakmi le a ṭuansuakmi zoh tahrat in mipi in an thlun.
4. Mipi ṭhansonak (People Development - Reproduction)
Dot (4) nak ahcun mipi pawl an pumpak nun rori hrangah, hruaitu ih a tuahsaknak le a sersuakmi ruangah mipi in an thlun.
5. A sang biknak (Pinnacle - Respect)
Dot (5) nak ahcun mipi pawl in nangmah na si ruangah hrimhrim le na dinpi mi thudik ruangah an lo thlun. Cucu kan simfiang sal asile hruaitu sinak ruangah si loin, hruaitu ih a pumpak nun rori zah le upatnak pek ruangih thlun an si.
Hruaitu sinak thawn pehparaw in nganmi ka vawn tarlang bet ding.
- Hruaitu sinak timi cu midang tlun ah huham neih thei khi a si. (John C. Maxwell)
- Hruaitu timi cu mipi hmai i hruai asi, mawng le uk a si lo, rualpi pawl ṭhansonak dingah ṭuan a si. (Kent Keith)
- Hruaitu sinak hi thuneihnak le ngahtheinak neitu si lo in ṭuanvo sawn a si. (Peter Drucker)
- Hruaitu sinak cu thudik le felfai zet ih tong hi a si. (John Stott)
- Khristian hruaitu sinak hi cu Pathian le Pathian mi pawl rian hi asi.
- Hruaitu sinak hi cu pehtlaihnak tuahtu a si. (Walter C. Wright)
- Hruaitu timi cu mipi a pakhatnak ah ret, mi pawlkom thiam, rualpi apwl thawn hnaṭuan tlang duhnak thinlung nei le pumpak nun ziaza thupi ah ret hi a si. (John Sipe le Don Frick)