1 KORIN 11:1
Khrih nun daan ka cawn vekin nannih khal in i cawng ve uh.
Tulai kan cangkangnak thawn zir in Facebook hmang lo ngaingai kan um nawn lo ti seh la ka sual lo ding. Kan nitinnun, kan lengsuaknak, kan innsangnun le kan hnatuannak ti vek tete kan tar cio. Mi hmuahhmuah in tuah daan le tar tlangpi a si ruangah zianghman ruat lemlo in duhduh tar ih ṭawng hluahhlo men a ol sam zet.Facebook cu 4 Octorber 2021 ah mallai buainak an neih ruangah Nazi 6 hrawng offline a si ih cui nazi 6 sungah an Stock million 86 (- $86 M) hrawng an sung ti a si. Cu tluk in mi tampi ih hman mi a si vek in kan nitin nun tlangleng daan tete tla tar nuam kan ti.
Facebook hi Face (Hmai) Book (Cabu) a si ti tla kan hngilh lo a poimawh zet. Online ih kan tarzo mi pawl delete a si hmanah Screenshot ih ret thei a si ti kha kan hngilh lo a poimawh.
St. Thomas Aquinas in “I am a man of one boook” a rak ti. Cumi umzia cu a nun cu mi ih siar rero mi Cabu pakhat ah a ruat aw ih siar tlak nun neih dingin a tum tinak a si.
Hlanlai ah cun Mi nunzia theih kan duh tikah an innhnen le sungkhat pawl kan rak sut theu. Asinan tusan ah cu Facebook Profile le kan tar mi tete zoh in kan mizia tampi mi in an theithei zo. Company tampi cun CV le Resume ah facebook tla an dil zo ti a si.
Na thinheng laiah na duhduh in online ah tar ding ralring thiam a poimawh zet. Kan thinsat laiah mi ih hmuah ding cu ret that, kan mah rori hmanih hmusal le siarsal ngam lo ding thil kan tar ngah pang theu. Thinsat laiah cun zianghman ih na ruat lo mi na thil tar mi in mi thinlung a kekkui ter thei. A thazawng ih mi thazang na pek a si le na ruat ban lo tiang in mi in an hlawk pi thei fawn.
Paul cun a nunnak cu mi ih cawn dingah a sim ngam vek in kan nih tla kan nitin nunah Pual vek ih mi siar le zoh mi si dingah zumtu kan zaten zuam cio uh si.