Cakzet
le ralṭhazet in um aw ti ih thu ka lo pekmi cu ziangtik hman ah hngilh hlah. Ṭih
hlah, na thin nau hlah; ziangahtile Bawipa na Pathian keimah in na fehnak kipah
ka lo umpi ding a si,” tiah a ti.
Pathian in Joshua
hnenah thu a pek. Ziangahtile Moses a um nawn lo hnuah Joshua cu beidong in
atha a nau ve ticu a fiangter nasa. Isreal mi pawl ih thinkoh le lungruh zia
cu Bible Cathianghlim sungah tampi kan hmu ding.
Cu pawl
hruai dingah Joshua cu thinhar in a um ko ding. Asinan Bawipa cun Joshua hnenah
ziangvek buainak a tawng hmanah a um pi ding thu a sim nawn sal ti kan hmu
thei. Joshua hnenah Pathian in a cah mi pawl cu Ṭihhlah, Na thin nauhlah tile
ka lo umpi ringring ding tihi a si.
Ṭihnak cu neihphung a si nan Bawipa thawn kan neh thei. Egypt saal
sungsuak fa hman ṭihpah cing ten Isreal mipi Kanaan ramah a hruai thleng a si
ahcun nang le kei tla Bawipa kan rinsan cun kan ti thei lo mi a umlo ding ti a
fiang.
Thinnaunak le mi kan banglo nak Satan in a hmang duh zet ṭheu. Na nunhlun hmang in maw, a silole na sinak hmangin maw, a lo siatsuak dingah a tum
ringring ko ding. Joshua cu saaltaannak Egypt ram ih ṭhanglian mi asinan
Bawipa’n a khaisang. Na sinak Bawipa’n a zoh lo, na thinlung sawn Bawipai duh
mi a si. Joshua 24:15, sungah “Kei le kan innsang cu Bawipa lawng kan rian
ding.” tiin Joshua cun Isreal mi pawl hmaiah Pathian a rinsanzia a langter. Cui a rinsannak ruangah Bawipa ih lamhruainak thawn a mi Israel pawl cu Kanaan ram tiang a hruai suak thei a si kha.
BAWIPA’N Joshua cu a umpi ringring vekin, nang le kei khal catlo in in
umpi ringring ti kan hngilh lo a poi mawh. Ziangvek dinhmun na thleng hmanah
Bawipa cu hngilh hrimhrim hlah awla Joshua vekin nehnak a lo pe ding a si. Pathian
thil maksak thleng dingah le a kutcak mangbangza hmu dingah Daniel le a rualpi
pawl vek ih thihnak hawrkuamsung hmanah a mah rinsan a ṭul.