3 Na mit sungih thingtum hman poisa lo in na unau mit sungih mithnawm fate kha ziangahso na poisat? 4 Na mit sungah thingtum a um nacingin ziangtinso na unau cu ‘Na mithnawm ka lo coih sak ding,’ tiih na ti thei? 5 Mititer aw pa! Na mit sungih thingtum kha suah hmaisata awla cuticun na unau mit sungih mithnawm cu fiang tein na hmu thei dingih na coih sak thei ding.
Khuahlan lai ah Nu pakhat a um ih, Nitin te a innhnen Nu ih thil sawpmi a failo zia cu a pasal hnenah a sim ringring ṭheu. Nikhat cu a pasal in an innhnen nu thil a pho rero lai cu innsung ihsin a rak zoh ih a thil sawpmi pawl cu a rak failo ngaingai ti kha hmuh tikah, sim dingin sangkate a ong ih a vawn zoh tikah an innhnen nui thil sawpmi cu a rak fai viarvi. Cutin innsung a lutsal ih a vawn zohsal lala cu an innhnen nui thil sawpmi a failo si sawn lon, an sangkate thlalang a rak bal sawn a rak si. Cui veten puan faite thawn an sangkate cu a vawn hnawt fai theh. A thaizing khua a vang ih an nu cu nidang vek thotho an innhnen nu thil sawpmi a zoh lala ih mangbang zetin an pa hnenah, "Papi kan innhnen nu thil sawpmi a fai ve thlang ho khaw," tiin a sim. Cutikah a pasal cun, "Nupi kan innhnen nui thil sawpmi a fai ringring ko hokhaw, a bal ih kan rak hmumi kha a thil sawpmi si loin kan sangkate thlalang sawn a rak balhtuk ruangah si," tiah a let.
Leitlun kan dam sungah zohman mi famkim le soisel ding umlo milai kan um dah lo ding. Asinan, Ca Thianghlim in midang nun rem kan tum hlanah kan mai nun zohfel ta dingah in fial. Mah hmuah ṭhat a tum in tumlo midang siatnak hmuah hmu keukeu zumtu kan tam ṭheu. Paul cun, "Jesuh khrih nun kan cawng vekin nan nih khal in cawng ve uh," tiah a ti. Midang hrang zohṭhimtlak siding kan zuam hmaisa dingih kan nun feh tlangin Pathian in midang nun in remsak hram seh.
Midang ṭhatnak rel dingah hmuah sim ding nei mumal fawn lo, thusia le hlasia rel dingah hmuah hrelh mi neilo kan si ahcun, Ca Thianghlim in insim cia vekin kan simmi pawl le kan relmi pawl cu kan mai hrangah kan tahfung a si leh ding.
Pathian in hman in duh!
Kan dinhmun fiang uh si la, Kan nun daan le ziaza fehtlang in midang in an nun an rem theinak dingah Pathian in thlasuah in pek hram seh.