Jesuh
cun hmaitontein a zoh hai ih an hnenah, “Himi hi minung hrangah cun a si thei
lomi a si, sikhalsehla Pathian hrangah cun ziang hmuahhmuah a cang thei,” tiah
a ti.
Pa pakhat cu Sai retnak hmuanpi kiangah a vak laiah, Sai Tum emem cu
hridai fate thawn khihmi a va hmu. Sai cu cak le thazang khohzet an si fawn
ziangah a suak lo a si pei tiah thu a ruat. A mangbang tuk cun Sai kiltu
hnenah,
“Saipi hi suak a tumlo maw si, duh sehla ṭanghman ṭul lawn hridai
fate cu a catter dingih a suak thei ding si,” tiah a sut.
Sai
kiltu cun, “Saipi cu a fate lai ah vaksuak lo dingin hridai fate thawn kan
rak kit ringring ih atang rero nan a suak thei dah lo. A rung tum ih thazang a
nei zo nan a tet lai ih a tuah theilo dahlo mi asi ruangah a suak thei cuanglo
ding ti thinlungput a nei ringring ih suak tla a tum hrimhrim nawn lo,” ti
in a rak sawn.
Laimi tampi, abik in ṭhangthar mino pawl cun thil kan tuah hlanah ti
theilo dingih ruataw cia kan tam. Ka vawn tuah ve hrimhrim dingih ka tuah theilo ngaingai asile ka cawl leh ding titu kan malzet. Thilṭha pawl mi ih tuah
dingah kan ret theh ih mi tuah/ṭuan peihlo mi kan tuah/ṭuan theu. Saipi vekih
mi in na tuah theilo ding, na fimnak thawn a kaih lo ti vekih in simmi kha kan
thinlung sungah kan ret ringring ih tuah suak kan tum lo ahcun, ziangtik hmanah kan thil ti theinak le kan talent kan hmusuak dah lo ding. Thilthar tuah
ding/ṭuan ding tih hrimhrim hlah.
Hlawhtlinnak thar na duh asile, Pathian rinsanin thilthar tuahngam awla, na tuah hlan ah
beidawng men hlah aw. Leitlun ih mi hlawhtling pawl harsatnak le beidongnak
tawnglo an um celo. Teimaksuah ih Pathian rinsan phahin hna na ṭuan asile hlawhtlinnak na ngah tengteng ding a si. Mi lai ih ti thei dingih kan ruat lomi Pathian thawn cun a theilo a um lo ti thei fiangtu si dingah Pathian in in thlasuah cio hram seh. AMEN
_________________
Refs:
Dan Western, “The 10 Most Inspirational Short Stories I’ve Heard,” Wealthy
Gorilla, https://wealthygorilla.com/10-most-inspirational-short-stories/
(accessed Dec 19, 2021).