Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si.
Hnihsuaksai thiam lar emem Kevin Hart a hlawntling hlanah innsan man tiang hman pek theilo in a nu a rak dil ṭheu. Inn hlangman pek lo cun inn ihsin dawisuak ding tiang a si tikah, a nu hnenah inn hlang man pek sak dingah a dil. A Nu cun Bible siar ta awla na inn hlang man cu kan rel ding ho khaw a rak ti. Mr Kevin Hart cu lunghnur nawn in a tlung sal. Thlakhat hnuah A Nu hnen ah a feh sal ih inn hlang man paisa a dil lala ih a Nu cun Bible na siar zo maw tiah a rak sut, Bible thu simawk dingah caan ka nei lo paisa si ka ṭul tiah a sawn. Thlakhat a vawn liam ngaingai cun Inn hlang man a pek theilo ruangah inn ihsin dawisuak thlang asi ding thu (Eviction notice) cakut a ra thleng. Kevin Hart Cun thinbang zetin A Nu hnenah a kirsal lala ih inn hlang man Paisa a dil sal. A Nui cun a hlan vekin Bible na siar zo maw tiah a rak let thotho. Thinbang le lunghnur pah in zetin a tlungsal ih a ti ngaih nak theilo cun Bible cu ka vawn siar sin kei cu tiah Bible a kau, Cu veten Bible sung ihsin cahnah te a tlak ih an vawn zoh cu thlaruk inn hlang man a rak si ziar.
A Nu cun Kevin Hart inn hlang man a nei lo ti a thei ih a Bible sungah a rak ret sak nan Kevin Hart cun keu hman kau lo in a ret ruangah reipi thin bang zetin a um.
Bawipa in kan thlasuah ngah nak ding lamzin le hmainawr daan ding pawl ca thianghlim sungah a ngan ṭheh ko nan a siar cu simlo a kau hman kau lo kan tam zet. Thlasuah ngah cu kan duh zet nan a ngah nak ding hrampi a si mi Pathian thu cu kan siar duh fawn lo ih Pathian thu kan ngai fawn lo. Bible in a ram le a fel nak hawl hmaisa dingah in sim a si kha. A ram le a felnak hawl hmasa tu piang cu thlasuahnak ngah hmaisa tu an rak si ringring. Kevin Hart vek in lungruh loin a thu kan ngaina ih kan siar a si le kan ṭul mi thildang pawl cu Pathian in pek ding in tiam cia a si.