1 Korin 13:13
Duhdawtnak thawn a pehpar mi ankaa pawl:
"Duhdawtnak a umnak ah Nunnak a um."
Mahatma Gandhi
"Kan raal pawl rualṭha ih thleng danglamter theitu thil ti theinak cakzet cu, Duhdawtnak hi a si."
Martin Luther King, Jr.
"Duhawtnak hnak ih cak le thil tithei, leitlun ah a um lo."
Rhonda Byrne
"Phurrit le thinharnak ihsin in luat/runsuak theitu cafang kom pakhat te a um, cucu DUHDAWTNAK a si."
Sophocles
"Duhdawtnak thawn, leilungpi kan humhim thei."
George Harrison
Duhdawtnak kan ti tikah zoh daan, hmuh daan le lak daan pawl a dang vivo thei ti sehla kan sual lo ding. Duhdawtnak kan paltlang daan ih zirin, thlum zet ih ruahtu an um rualrual in khaa zet ih rak paltlangtu tla tampi an um ding ti zum a um. Ziang a va sikhalle, a thlum ah maw a khaa ah maw, Duhdawtnak hi thil a ti thei ih, cahnak humham a nei zia cu tampi siar ding le zohṭhim ding tampi a um. Kan Bible rori ah tla duhdawtnak ih thil ti thei nak tampi a taarlang ve ih Pathian ih duhdawtnak maksak ruangih a fapa neihsun tiang in pek nak tla kan hmu thei.
Leitlung daan in siseh, thlarau daan in siseh duhdawtnak hi ziangvek saw a si tihi lak ding tampi ummi sung ihsin phun (4) te kan zoh tlang ding.
1. Rualpi duhdawtnak
Rualpi duhdawtnak cu Greek cafang in "Φιλία" (Philia) ti a si ih, Mirang cun "Friendship Love" tiin an let.Philia timi Rual le pi duhdawtnak hin rinumnak, hngohsan ngamnak le rinsantlak ih langternak ih rak suak mi duhdawtnak pakhat a si. Rualpi ṭha nei cu Sui le Ngun tampi nei hnak in a ṭha sawn tla an rak ti ṭheu a si kha.
Thifum 18:24
"Rualpi hrekkhat cu caan tawite sung lawng an hmun;
Sikhalsehla rualpi ṭhenkhat cu unau hnakin mi an tlaihsan sawn."
Thufim 27:10
Na rualpi ṭha siseh, na nu le na pa ih rualpi ṭha siseh,
va hngilh hlah; Harsatnak na ton tikah na unau
va sim hlah; Khawhlatpi ih a um na unau hnakin
na kiang naite ih a ummi, Na innhnen in a lo bawm thei sawn a si.
Kan Bible thianghlim sungah hman rualpi ṭha neih a sunglawi zia tampi in rak sim. A hmun mi duhdawtnak a silo nan a hnget zetmi duhdawtnak ah seer theih mi duhdawtnak a si.
2. Innsungsang duhdawtnak
Innsungsang duhdawtnak cu Greek cafang in "στοργή" (storgé) ti a si ih, Mirang ṭong cun "Family Love" a silole "Familial Love" tiin an let.
Storge timi Innsang duhdawtnak tla Bible Ca thianghlim sungah tampi kan hmu. Nui duhdawtnak siseh, Pa ih nun simnak siseh, innsang duhdawtnak thawn a pehpar mi tamzet hmuh ding a um. Nu le Fa karlak ih nunzirh daan ding le duhdawtnak langter daan pawl tiangin nganmi tamzet a um.
Innsungsang duhdawtnak hi thisen rori ih pehzawmawk mi a si ruangah hngetzet le rinumzet a si ve. Harsatnak kan tawn caan ah siseh, buainak kan tawn caan ah siseh, kan hawl le kan hlam ṭheu mihi kan u le nau, sung le khat an si tlangpi. Isaiah 49:15 sungah, Nui duhdawtnak a sangzia tla a rawn taarlang a si kha.
3. Fala/Tlangval duhdawtnak
Fala/Tlangval duhdawtnak cu Greek cafang in "Έρως" (Eros) ti a si ih, Mirang ṭong cun "Romantic Love" a silole "Intimate Love" tiin an let.
3. Fala/Tlangval duhdawtnak
Fala/Tlangval duhdawtnak cu Greek cafang in "Έρως" (Eros) ti a si ih, Mirang ṭong cun "Romantic Love" a silole "Intimate Love" tiin an let.
Eros timi Fal/Tlangval duhdawtnak tla a nasa ve zet ṭheu. Fala/Tlangval ngaiawk, duhdawk tikah an thu kan ruat rero ṭheu, kan thikthu khal a sia. Kan duhdawtnak kan langter vekin duhdawt hlawh kan duh. Nitin hmuhawk khal i khawp awlo, biak aw, message aw le phone call aw ringring duh laifang a si ti sehla kan sual lemlo ding.
Duhdawtnak langter ih Romantic zetzet ih thil tuah sak tivek an duh. Himi Fala/Tlangval duhdawtnak hi a hmun lo vek a si ko nan, Eros timi fala/tlangval duhdawtnak ruangah nunnak tiang liam pi tu mi tamzet an rak um ve. Fala/Tlangval duhdawtnak ruangah nun thleng verver tla hmuh ding tampi a um ve thotho.
4. Pathian duhdawtnak
Pathian duhdawtnak cu Greek cafang in "αγάπη" (Agape) ti a si ih, Mirang ṭong cun "The Love of God" a silole "Unfialing Love/Eternal Love" tiin an let.
Pathian duhdawtnak cu Greek cafang in "αγάπη" (Agape) ti a si ih, Mirang ṭong cun "The Love of God" a silole "Unfialing Love/Eternal Love" tiin an let.
Agape timi a hmun mi duhdawtnak hi cu kan Pa Pathian ih duhdawtnak a si ih, a duhdawtmi hrangah a neihmi le a ti theinak sangbik suahin, a mai zawn ruat aw riai loin, Van ih sui lukhum tan ta in leitlun ah thi dingih nunhlan ngam duhdawtnak a si.
Pathian duhdawtnak cun ramri a nei ve lo, misual kan si cingin in duhdawt ih a mah phatsantu hman a hnawng dahlo mi duhdawtnak i khat a si. Ziangvek misual hman thi ding i sianglo
John 3:16
"Pathian in leilung hi a duhdawt zet ruangah
a Fapa neihsun a pek ih amah a zumtu hmuahhmuah cu
thi lo in kumkhua nunnak an co ding."