NA "LEI" KHA MIDANG HRANGAH "MEI LE FEI" A SI PANG MAW?

James 3:5-6

⁵ Kaa sungih lei khal hi cumi bangtuk a si; a fate na in thuhla tum zetzet in a porh thei.
Thing le hrampi ziangtluk tupi kau a si khalle meici fate in a ur kang thluh ṭheu khi ruathnik uh. ⁶ Cuih meici bangtuk cu lei hi a si. Lei cu a ṭha lomi a si ih kan taksa sungah umnak hmun a rak nei ih cutawk ihsin ṭhat lonak cun kan ruangpum zate ah ‌a hrawh thluh. Kan nunnak hri le hram tiangin meisa in a ur ih cuih meisa cu hell hmun ihsin a thomi a si.

James cun zumtu kan nun ah "LEI" uktu si dingah le "LEI" ih a thupit zia pawl tamzet in rak sim. Kan "LEI" hi a fate zetnan, tlang tum zetzet hman kangral theitu "MEI" le mi nunnak tiang laksak theitu "FEI" a si pang thei. "LEI" cu taksa peng fate a si ko nan, kan nunnak hri le hram tiang a siatsuah thei a si ti kha kan thei ringring a poi mawh zet. Mifim pawl cun "LEI" le Kaa thawi pehpar mi thu tamzet an rak ngan. 

Tim Walters cun:

"Ṭongkam in 

Mi a bawm thei;

Mi a damter thei;

Asinan,

Mi tla a natter thei ih;

Mi nunnak tiang a lak thei," tiah a rak ngan.

"Na ṭongkam/daan ding na ralring thei ko nan;

Na ṭong suak hnu ih mi nunnak ziangtin a hngawng ticu na ralring cia theilo.

Curuangah na ṭonghlan ah ralring aw."

Anonymous

Kan "LEI" cu

🌿 Pathian thangsiatnak "LEI" siloin;

🎯 Pathian thangṭhatnak "LEI"...

🌿 Midang thangsiatnak "LEI" siloin;

🎯 Midang thangṭhatnak "LEI"...

🌿 Midang tlaksiatnak reltu "LEI" siloin;

🎯 Midang din tharnak reltu "LEI"...

🌿 Midang tluksiatnak thlentu "LEI" siloin;

🎯 Midang tundin thar nak "LEI"...

Caan tampi ah kan thinheng caan ah le thinsat caan ah kan "LEI" kan uk thei dah lo ih, kan duhduh kan tlawk caan a tam ṭheu. Mirang pawl in an rak sim mi cu,"Mi Pakhat in kan thinheng lai ih kan ṭongmi pawl khi, second 10 tla kan ṭong hlan ah ruat ta sehla, 100 ah 99 cu kan ṭongsuak duh lo ding tiah an rak ti." Ca thianghlim sungah "LEI" ih thupit zia in sim vekin kan nitin nunah kan ṭongkam fangkhat te ruangah midang in thlasuah le thazang an ngah thei vek in, midang ih tluksiatnak tla a thlen thei ti kha hngilh loin kan ṭong kamkhatte ih hmual a neizia theithiamtu le kan "LEI" cu midang hrangah "MEI le FEI" silo ding in kilkhawi thiamtu si dingah Pathian in theithiamnak in pe hramseh.