2 Timothy 2:20-21
20 Inn tumpi sungah cun khokheng a phunphun an um. A hrek cu ngunih tuahmi an si ih a hrek cu sui ih tuahmi an si. A dang cu zanthing le tlak ih tuahmi an si. A hrek cu ni sunglawi caan ih hman ding an si ih a hrek cu nitin hman menmen ding an si. 21 Zokhal a ṭha lomi hmuahhmuah a hrial ih thiangte in a um a si ahcun hnaṭuan sunglawi hrangah hman a si ding. Ziangahtile pum pe-mi a si ih hnaṭuan ṭha ṭuan dingah a tiar aw ṭhepṭhepmi a si ruangah a Bawipa ih hman tlak a si.
Paul in a duhdawt zetmi Timothy cu mino te a si laiah Pathian hnaṭuantu dingin Ephesus kohhran ah ṭuanvo a tan ta ih, cui Ephesus kohhran pawl hruainak dingah a ṭulsammi le zuam ringring ṭulmi thu pawl tamzet a rak kuat.
2 Timothy bung 2 sungah kan hmuh mi pawl tampi sung ihsin cang 20-21 kan zoh asile, Paul in zumtu le Pathian riantu phunhnih in a langter ih cucu khokheng tahṭhimnak thawn a sim. Cui Khokheng pawl cu an mah tawk ten mawi zetzet ih tuahmi an sinan, hman an si daan cu a bang aw ṭheh lo. Hmantlak khokheng le hmantheih khokheng a um ih, cuvek ṭhiamṭhiam in ni sunglawi ih hmanmi le nitin hman menmen ding a um lala fawn.
Himi bung le cang kan zoh fiang asile Paul in Zumtu Pathian rianṭuan dingah Pathian in zovek khal hman theihlo a neilo nan, sunglawi zet ih hmanmi a si nak dingah thil ṭha lomi hmuahhmuah hrial ih thianghlim te in tiar aw ṭhepṭhepmi a si lawngah Bawipai hmantlak a si thu in sim.
Curuangah Pathian cun milai lawng hman silo, lungte khal a hmang thei ko nan, Ropi zetih a loram sungah hnaṭuan ding ahcun hmantlak si dingin nun thianghlimnak le thil ṭha lomi hrial tengteng ta kan ṭul zia fiangten in sim. Inn thil le ri hman hmantheih tampi an um nan, ni thupi le thil thupi kan tuah caan ah hman tlak ngaingai le rintlak ngaingai mi thil, mi zoh khal ih mawi le ṭha kan ti mi lawng kan hmang a si ahcun, Pathian ram hrangih hnaṭuan dingle thlarau hlo kaitu ding sinsin cu ziangtluk in kan poimawh timi kan thei fiang a ṭul. Zumtu um sawhsawh men thei kan silo Pathian hmantlak si dingah tiar aw cia ṭhepṭhep in ziangtik lai caan khalah Pathian hman tlak si dingin zuam cio uhsi.