Social media ih side-effect timi cu Social Media hmang ruangih a thlen mi thil pawl an si. Thil ziangkim hi an ṭha thluh lo ih an se thluh fawn lo. Social Media hin ṭhatnak tampi a neih laiah ṭhatlonak khal a nei ve. A hmang thiamlotu hrangah siatnak a thlen lawng si loin hmang thiam kan timipawl khalin a siatnak an tawng ve thei. Cupawl cu mallaiin zoh hniak sehla;
1. DUHDAWTNAK HLAWHSAM:
Social Media ihsi theihawk hi cu a takih theihawk thaw cun an bangaw ṭheu lo. Online parah cun kan zuk tla a rak mawideuh, kan awka tla a rak thlumdeuh hleiah ziangkimah kan lang mawideuh cingcing. Cutivekih duhdaw hlawhtling zet an um laiah mualphonak le siatnak mi thlen khal an um ve.
2. SUAL TUAH DING HRANG INFORMATION:
Mi siatsuah duh hrangah Social Media ihsin information an ngah ṭheu. India Fights Back timi a takih thilcangmi zuknung ah nupa tuak khatte hin fanu kum 7 mi hrawngte an nei. Facebook ihsin an sung zuk, an fanu tlawngkai, an pabik zung feh le nubik hnaṭuan tla an thlah ṭheu ruangah nauhak rutupawl in ziangvek nauhak an nei, ziangtikah a remcang ding an thei ih an fanu an ruksak thu a um a si. Online ih kan taar/thlah mi pohpoh hi a hlo lan ta menlo ti kan fiangih, kan zoh duhsal lo dingmi thil pawl tla thlah/taar lo a ṭha bik. Hming siatnak le sual hawl duhtu pawl hrangah caan ṭha kan pek ah a cang thei.
3. SEX LAM A TAM:
Social Media ihsin serh (Sex) lam thil hmuh ding a tam ngaingai. Fimkhur lo ahcun sual ah in hruai thei. Cun mah lam khal a him tawk hnipuan thawn zuk thlahaw sela a fim tlak bik. AI Technology timi thil pawl in kan san a luah khat rero lai ah, kan theilo sungah midang in kan hmel le ruangrai hmangin zuknung an tuah thei rero zo ti tla kan theih a ṭha. Fa le Nau pawl kan hman ter rero mi phone pawl tla kan ralring lo ahcun, kum kimlo nauhak sual tuah daan ding kan rak zirh rero a si sual thei.
4. RITCILH AWLTE:
Facebook lephei cu atcilh a awl ngaingai. Tuluk ih tlangval pakhat cu cawl lo riaiin ni hnih sung Facebook a hman ruangah a luzingin a tlu ti thuthang ah siar ding a um. Caan kan hman daan siat ṭheh ko ih in tuah theitu hi Facebook a si. It caan, ei caan, tuan caan le colh caan tiang a danglam ter ṭheh thei. Pathian thu thawn caan kan hman ṭheu mi pawl tla Facebook in a luah pang cun kan nun tiang hman a ro car vivo thei a si. Minute malte sung Bible Ca Thianghlim siar a har ngaingai laiah, Facebook thawn zaan vaar men cu a olsam ngaingai fawn. Social Media hman daan kan thiam a poimawh zet a si.
5. TAWHAWKNAK LE ELAWKNAK:
Social Media hi tawhawknak le elawknak hmunpi ah a cang thei. Hmel hmuhawk lo a si tikah nauhak tete khalin upa sawn kha ṭawngkam ṭha lo zetzetih ṭhuat lawk mai a awl. Ṭawngkam sia le na zetzetih tiawk khal a awl ngaingai. Hmaiton rori ih kan ṭawng ngamlo dingmi hman Online ahcun kan pawr ciamco thei. Mitampi Online ih an thil tuahmi le taarmi ruangah thatawk (Suicide Case) tamzet a um zo.
Curuangah, Online ih kan taar/tlah mi pawl kan ralring ngaingai a ṭul. Ziangtinkim kan tuah mi pawl hin hngawng (Side-affect) a um ringring ti kan fiang ahcun hmailam caanih buainak le harsatnak tampi kan hrial law thei ding a si.
Outline Ref & Cred:
Rev. Lal Lian Zual, Social Media Le Khristian Nun: FCFS Makazin (A vawi 4 nak), p. 135.