Samson cu Pathian in a mi Israel pawl runsuaktu dingah a hril ih cahnak maksak a pek. Asinan, Pathian ih thutiam le duhdaan thlun lo in tisa duhnak a thlun ruangah a mit-mu tiang phorh tuar in a nunnak tiang a liam.
Samson a tluksiat hlan ah Pathian in a nun lamtluan ah thil tampi a thlenter.
🎯 Samson cu a Nu le Pa in hnamdangmi Pathian theilo fala neilo dingah an rak sim (Thuthentu 14:2-3).
🎯 Samson cu a nu le pa thawn Timnah (Filistin Ram) an pan lai ah Kiosa note in a rak kham. Asinan Pathian cahnak huham thawn olai ten a neh (Thuṭhentu 14:6-7)
🎯 Samson cu a raal pawl kut sungah a thleng ih sualsir in thlaza a cam rero ko nan a nunnak a humhim thei nawnlo (Thuṭhentu 16:23-31)
Zumtu kan nunah Pathian in in kawhdaan a bang aw lo men thei. Asinan, thil ṭhalo le Pathian duhlo zawng kan tuah caan ah Pathian in hminsinnak in siseh thil dangdang hmang in in rak ko ṭheu a si.
🌿 Pathian kawhnak cu Na unau, sungkhat le rualpi hmang in tla a si men thei.
🌿 Pathian kawhnak cu Kaihkhih, buainak le harsatnak tla a si men thei.
🌿 Pathian kawhnak cu Accident le Taksa natnak tla a si men thei.
Pathian in a lo khawhnak theithiam in sualsir kan ṭul.
🍃 A veikhatnak ah nemten a lo ko ding
🍃 A veihnihnak ah na deuh in a lo ko dingih vansanglam in na um ding
🍃 Na sual na sir cuanglo ih Pathian duhlo mi thil na tuah peh rero asile a tlai pang ding.
Samson vekin thihnak horkuam na thlen hnu lawngah na sual na sir asile Pathian ngaidamnak na co men theinan na nunnak na humhim thei nawnlo ding. Pathian khawhnak na theih ahcun a tu hi caanṭha a si, sual sir in Pathian pan awla a lo ngaithiam dingih na natnak a lo damter sal ding a si.