Thufim 10:4
Zaangzelnak in farahnak a suahter, lawtnak in lennak a suahter.Thufim 14:23Hnaṭuan khung ṭuan awla na cawm aw thei ding; To men ih ṭong rero cu farahnak a si.
Khuahlanlai ah Siangphahrang pa pakhat a um. Nikhat cui siangphahrang cun a ram sungih mifel le teimak a suahtu pawl ka bawm hai ding tiah khua a ruat. A hnaṭuantu pawl cu a ko hai ih mi tampi feh leh vah nak lamzin laifang ah Lung tumzet ret dingah a fial hai. Siangphahrang pa cu zo in so maw a retmi lungpi cu ṭhawn ding tiah thingkung phen te ihsin a hnaṭuantu pawl thawn an rak pih thup. A ram sungih a rinsan zetzet mi le hruaitu pawl cun Lungpi an hmu nan an pial san vivo. A hrek cun siangphahrang pa an mawh puh ih, mipi feh tamnak lamzin rori tla ṭhaten tuah lo tiah an phuzai bet. Culaifang ah zohamn ih ziang an siar lemlo mi farah pate cu thilphur phah ten cui lamzin cu a rawn zawh ve. Lamzin laifang ih lungpi a hmuh tikah, a thilri phur mi pawl cu lamzin kiangah a ṭhum ih lungpi cu a theih patawp in a vawn nawr. Caan tawk fang hnuah cui lungpi cu lamzin kiangah a thlen thei ta riai. A thil lak a tum laifang ah a ṭhawnmi lungpi tangah thilfun te a hmu. Ziang sipei tiah a vawn zoh ih cui thilfun te sungah cahnah, sui, ngun le lungvar mankhung phunphun a rak um. Cahnah te cu a vawn siar tikah "Teimak le zuamnak ih laksawng" tiah Siangphahrang pa a mah rori ih tacik khen mi le nganmi a rak si. A lungawituk ih damsung milian le neinung zet in a um ta.
Caan tampi harsatnak kan hmu veten pahtlang lawn pialsan kan tum ṭheu. Mi tampi cun harsatnak an ton tikah tuahhlan/thamhlan hman ah a har dingthu le a buaithlak dingthu kan ruat hmaisa ṭheu. Buainak le Harsatnak a pahtlang ngamtu lawngin hlawhtlinnak rah an tep ngah ṭheu.
Mei Lung (Light Bulb) rak tuahsuak tu Thomas A. Edison kha vei thawng luan a hlawhsam nan a bei a dong men lo ruangah leitlun pi ih hman ding mei eng a tuahsuak. Usian Bolt kha second 9 tlan dingah kum 4 sung rori nasazet in timtuahnak a nei nan, nang le kei cu thlakhat hnih ah kan beidong san men a si lo maw.
Hlawhtlinnak rah hmuah duhfawn si, a lamzin sial dingah le ngam fawnlo kan si ah cun ziangtik hmanah hlawhtlinnak kan hmu dahlo ding. Tlawmngai, Teimak le zuamnak cu hlawhtlinnak lamzin in sialsaktu a si ti kha hngilh hrimhrim hlah.
