St. Thomas Aquinas cun "Kei cu cabu pakhat ka si" tiah a rak ti dah. Ziangahtile kan umtu daan, kan caan hman daan pawl mi in an rak siar rero ruangah a si. Thilṭha kan tuah ah maw, thilṭhalo kan tuah ah maw midang in in rak siar rero ih kan thuanthu kan ngan rero a si ti kan theih a poimawh zet.
Thuanthu timi hi kan dam laiah le kan um laiah cun kan mah rori in siseh midang khal in ziang hmanah kan ngaihsak lem ṭheu lo. Asinan, kan thihhnu le kan umlo hnuah kan unau, sungkhat, rualpi le kan ralpawl tiangin kan thuhla an rel vivo lai ding tikha kan theih ringring a ṭha.
Curuangah ralring le fimvar ten nun daan thiam kan ṭulzet. Damsung caan tawite ah kan thuanthu a mawi maw? Ka tu le fa pawl in siarsal dingah kan duh maw? timi sutnak tumpi kan nei a si. Mi ih in siar theinak cu kan ṭongkam, kan nun daan le kan tuahmi pawl tla an si.
Curuangah thufim ṭhenkhat cun:
Ṭongkam thawn a pehpar mi
Na ṭongsuak mi hmuahhmuah thudik siseh;
Asinan, thudik ti ruangah sim ṭheh ding a si thluh lo - Voltaire
Na ṭongsuak mi hmuahhmuah thudik siseh;
Asinan, thudik ti ruangah sim ṭheh ding a si thluh lo - Voltaire
Ṭongkamsia ṭonglo ih volhsal ruangah zohman a pum a na dah hrihlo;
Asinan, ṭongkamsia ṭongsuak ruangah mi tampi nun siatsuah an um zo - Winston Churchill
Na ṭonghlan ah
A dik ngaingai maw?
Mi ṭhathnemnak a pek maw?
Mi hrang ṭhazang a si maw?
A ṭul ngaingai maw?
ti pawl ruat ta aw - Alan Redpath
Na ṭonghlan ah ruah ta aw;
Na ruahmi hmuahhmuah ṭongsuak ṭheh hlah - Alexander Lebed
Na ṭongkam cu na conkiang vek an si;
Na ṭongkam in na hmailam nundaan a sersiam thei. - Florence Scovel Shinn
Nundaan le tuahmi thawn a pehparmi
Zohṭhimtlak nun nei dingah thilṭha tampi tuah a ṭul nan;
Veikhat na tuah sualmi in a siatsuah ṭheh thei. - Benjamin Franklin
Mi in thilṭha na tuahmi tampi hnak in;
Thilsual pakhat na tuah pang mi an mang rel sawn. - Democritus
Tampi na ṭongin mi na bum thei nan;
Na thiltuah mi rah in a pholang thotho ding - Anonymous
Ṭongtam hlah, tuah tam sawn aw;
Na thlawhtlinnak in tlang a lo au sak ding - Anonymous
Thilṭha na tuahmi hmuahhmuah fate le tum a um lo;
Na rualpi unau hnisiamsi ten na biak tla thilṭha tuah a si. - Muhammad
Mirang thufim ah "Na tuahsual le ṭongsualmi cu ngaidam a theih konan,
Hngilh theih asilo" tiah an rak ngan.
Ziangahtile kan tuah ṭha ah si maw, kan tuah ṭhalo ah si maw, ziangkim kan tuah mi in neh (keneh) a tan vivo. Cucu thuanthu vekin mi thinlung ah a cam ringring ih damsung daih a si ruangah ziangkim ah fimkhur zet le ralring zet ih kan um/nun thiam a poimawh zet a si.