Efesa 5:17
Mi-aa si hlah uh;Bawipa in tuahter a lo duhmi kha hawl tum sawn uh.
Nikhat cu thingcek cakzet tlangval pakhat in hnaṭuan a dilnak a ngah thu a pu in a ra sim. Lungawi zetin hnaṭuan dingin a thaizing ah a pok cih ih nikhat ah thingkung 18 ihsin 20 lai a hau ih a cek ṭheh thei. A zarhhnih nak a vawn kim cun thingkung 11 in 12 hrawng lawng a hau ih a cek thei. Mangbang zetin a zarhthum nak ah zingpit ten a tho ih zaan sim tiang nasazet in thing a hau ih a cek nan kung 6 lawng a hau ih a cek ṭheh. Thin nauzet cun a pu hnenah, “Ka cakzet hmang ka tiaw ih hmantlak ka si nawn ual lo, nidang ahcun thing kung 20 vohvoh kan hau ih ka cek thei nan, tucu kung 10 hman ka hau thei nawnlo, hna dang kan hawl sawn a ṭul thlang ding abang,” tiah a sim. A pu cun tlangval pa hnenah, “Ka lo zoh ih na cakzet ko si, hnaṭuan cawl lo in na hreipi a hriam maw hriamlo vawn cek (Zohfel) ta awla,” tiah a sim. Cui tlangval pa cun a hrei a vawn cek (Zohfel) cu thing kung a hau ih a cek tamtuk nak ah a hreipi a rak bil sawn a rak si.
Nang le kei tla nasazet in hna kan ṭuan kan ti nan, hlawhtlinnak kan ngah dahlo ih beidong zetin kan um caan a tampi. Cathianghlim in Pathian uknak le a felnak hawl hmaisa uhla thil dang hmuahmuah cu pek in nan um ding tiah in sim ko nan, Pathian thawn kan pehzawnnak a ṭha maw tiah cek (Zohfel) sawn loin kan ti theinak kan zoh ṭheu nak hin beidongnak ah in thlen pi ṭheu a si kha. Culawng hman silo Bawipa ih duhmi kha hawl ih thlarau tharthawh sawn kan ṭul thu in sim a si khaw. Hna kan ṭuan thei, ka ei thei le kan in thei mi hi Pathian zangfahnak ruangah a si ti thei in, ziangkim kan tuah kan ṭuan hlanah Pathian hnenah hlan ih a duhnak hawl hmaisa tu si kan ṭul. Milai cun khua kan khaang ṭheu ko nan, a netnak ih thuneitu cu Pathian a si kha hngilh hrimhrim hlah. Na hlawhtlinnak cu tlangval pa vekin na thazang ah a um lo, a hreipi a simi Pathian thu sawn ah a si.