2 Timothy 2:14, 23
14 Ṭongfang men parih thu elawk rero cu baang thlang uh, tiah Pathian hmaika ah na milai pawl ralrinnak pe awla an hngilh lonak dingah sim cingcing aw. Cubangtuk thu elawknak in ziang ṭhathnemnak hman a suahpi lo; a ngaitu pawl a siatsuah sawn a si.
23 Aatthlakza le zianghman thei cuca lo ih thu elawknak cu hrial aw. Cubangtuk elawknak cun tawhawknak a suahter ti na theihmi a si.
Khuahlan laiah Pawpi (Tiger) le laak (Donkey) an el aw ti a si. Laak (Donkey) in Pawpi (Tiger) hnenah, “Hrampi cu a pawl rong a si tiah a va sim.” Cutikah Pawpi (Lion) cun, “ṭhaten zoh aw hrampi khi a hring rong na hmulo maw tiah a el ve.” Caan tawkfang an elaw hnuah an buai deuhdeuh ruangah ramsa Siangphahrang Kiosa (Lion) hmaiah an thlen aw. Ramsa Siangphahrang Kiosa (Lion) cun ziang saw nan elaw tiah laak cu a sut. Laak cun,“Siangphahrang hrampi khi a pawl rong a si lo maw,” tiah a sut. Cutikah Ramsa Siangphahrang Kiosa (Lion) cun, “Aw a dik,” tiah a let. Laak (Donkey) cun, “Siangphahrang Pa Pawpi (Tiger) a silo hrampi cu a hring tiah in el, hremnak nazet pe aw,” tiah a ti. Siangphahrang Kiosa (Lion) cun na dil vekin siseh Pawpi cu kum (5) sungah zianghman ṭong lo dingin daan kan tat tiah thu a pek. Laak cu lungawi zetin lam phagh in a suak. Pawpi cun daan-tat nak cu a cohlang hnuah Siangphahrang Kiosa thu a sut, “Siangphahrang pa ziang hrampi cun a hring rong silo maw,” tiah a sut. Siangphahrang Kiosa cun, “Aw na sim dik,” tiah a let. Pawpi cun, “Asile ziangah hremnak nasazet i pek,” tiah a sut lala. Siangphahrang Kiosa cun,“Nang vek ramsa cak le fim in hivek san neilo thu le hla ah Laak na el rero ih caan na hmang ruangah hremnak ka lo pe a si,” tiah a let.
Caan tampi ah theithiam duh i duhlo mi hnenah thil ṭha kan sim rero ṭheu nan sawtnak a um ṭheu lo. Cuvek ṭhiamthiam in mi ṭhenkhat cu thudik thei konan mi el ṭeuṭeu duh ih mai simmi dikbik le ṭhabik ih ruat an um ve lala fawn. Cathianghlim in cuvek pawl simfiang dingah ziangvek thudik le finfiahnak khal hmuh awla an theitiam duh cuanglo ding ruangah caan hlolak hmang ih elawk rero hnak in hrial a ṭha sawn tiah in zirh a si. Theithiam duhlo hnen ih thu el rero in tawhawknak tiang a thlen thei ruangah thil ṭul lemlo ahcun hrial a ṭha bik.