Innsang ih fanau zohkhen dan le zirh dan ding course tam zetzet zir ciamco kan umlo men thei a bik tak in kan laimi pawl lak ah ECCD (Early Childhood Care and Development) tivek ih zirnak nei ciamco hi thupi ah kan ret lem ṭheulo hi a poizet. Nauhak zohkhen le zirhnak thawn pehparin tampi ṭhangso kan ṭul tiah ka hmu. Duat luarkai le thlah zalen tuk siri tivek tete hmuh ding kan laimi lakah a um hnuaihni tikah duhsaknak thawn zirnak rori kan nei theilo hman ah nitin kan nun dan le um dan fehtlang in kan zirh thei timi tla vawn tarlang ka duh. Zirhnak ṭhabik le hmaisabik a si mi innsang ihsin ziangtin fanau kan zirh ding timi thu (3) ten ka vawn tarlang duh.
Mifim zirsang le Khristian innsang zohkhennak lam ih zirnak sang neitu pawl cun hitin an rak sim, "kan fanau le innsang ih "NUPI" kan duat dan zoh in kan fapa pawl in zirh/sim ciamco ṭullo in an ṭhanglian tikah an "NUPI" duat dan an thiam cih," tiah an rak ngan.
Pa tampi ih ṭultuk ih kan ruah lemlo mi cu mi hmai le fanau hmai ih nupi duat hi a si. Kan nei aw zo si ti men in duhdawtnak innsang ah langter nawn lemlo kan tam sawn ti sehla ka sual lo men ding. North America le Europe lam ahcun Innsang umtu daan ding le nupa zohkhen aw dan ding pawl an nauhak lai ihsin an zirh aw tikah duhdawtnak langter ding cu an harsat lemlo. Laimi tampi lak ah hin duhdawtnak langter ciamco hi kan uar lemlo a si bik cule zirhtu ṭha tla kan rak nei lemlo ruangah tla a si ding. "Ka nu le pa ka lo duhdawt" tiih sim ding rori hman kan ngam lo ṭheu. Ziangahtile kan hmuah dah mi le kan theih dah mi a rak si lo ruangah a si.
Na "NUPI" duat thiam awla na fapa in a "NUPI" a duat thiam ding tinak a si cu. Na "NUPI" na duat thiamlo ih ziang na siar lo veten, na fapa in a nu a ṭihlo cih dingih "NUPI" a neih tik khallah duat daan le zohkhen dan a thiamlo ding.
2. NA PASAL ZAH THIAM AW:
Innsang pa tamsawn cu nupi ih rinsan le duat mi an duh ngaingai. Na "PASAL" zah thiam awla duat hawn duat hliaphliap sin awla, na duhmi ziangkim na ngah thei dingih cu hleiah, na fanu in "PASAL" a nei tikah na zirh/sim ciamco ṭullon "PASAL" zah daan le zohkhen dan a thiam cih mai ding.
Inn leng nei khal ah ka "PASAL" ka nehsawh ti phun ih kawk ringring tuih fanu cu tlangval pawl hman in an uar ngamlo ti a si. A nu vek a si pang ahcun an tiih an hrial ṭheu.
"PASAL" pawl ih lungawinak cu zianghman asilo. A mah kha rinsan emem phawt awla, ziangtinkim ah "PABIK" nangmah umlo ngaingai cun maw vawn ti awla ziangkim na fialmi tuah a huam ṭheh ding.
Na "PASAL" zahthiam le duat thiam awla na fanu in "PASAL" a nei tikah a zahthiam in a duatthiam cih mai ding. Na "PASAL" ziang na siarlo veten na fanu in a pa ziang a siarlo cih ve dingih "PASAL" a nei tikah khal zahthiamnak le duat thiamnak a neilo ding.
3. MIDANG ZAWNRUAT IN BAWM AW:
Ka fanau pawl in kan tuah dan le kan nun dan in zoh ringring ti kan theih a poimawh zet. Na fa le hmaiah midang zawnruahnak, duhdawtnak le lainatnak nei ringring awla, an ṭhanglian tikah midang duhdawtnak, zawnruahnak le lainatnak an nei cih mai ding.
Na fa le theih ah midang na relse rero asile, a rei hlanah na fanu/fapa pawl in an rualpi pawl ṭhatlonak le tlaksamnak an lo sim sawng ve rero ding.
Ka rilrah pawl hi kan CD/DVD lawngte an si ti kha hngilh hrimhrim hlah. A suak pek ihsin thil um dan an zohthawk rero zo. Mifim pawl ih an simmi cu naute nui pum sungih a umlai ihsin duhdawtnak le lainatnak an theithiam zo ti a si. Curuangah zohṭhimtlak nu le pa kan si ahcun kan fa le pawl in kan tuah dan le kan um dan zoh in thil ṭha tampi an tuah thei ti thei ringring in zohṭhimtlak nun nei dingah zuam sinsin uhsi.