Zumtu ramsa nun ihsin kan ralrin le zir ṭulmi thil tamzet a um ve ṭheu. Thilṭha zirding tampi a um vek ṭhianṭhian in thilsia zohding khal tampi a um ve thotho. Zumtu ti aw ve nan nun ih langlo zumtu kan tam vivo ih zumlo tu vekih nung dualdo tla hmuh ding a tam vivo. A sia ṭha zawngin zirding ṭulmi ramsa nun ihsin zumtu nun ka rawn taarlang ding.
1. Thuro (Dove)
Thuro cu vate nun neem, midang siatsuah ti nei lo, nun ziadam le midang buaiter lo an si.
Zumtu midang zumtu le zumlotu unau dang hmaiah nun neem le tangdorten, nun ziadamnak nei dingih in zirhtu a si. Nun neem, tangdor le zaidam hi, Thuro nun a si.
2. Muvanlai (Eagle)
Muvanlai cu rawl thar lo ei duh lo, a thla a thlong ih a thazang a mal tikah, thla thar le thazang thar nei saal dingih zuam rero phah in harsatnak hmuahhmuah pahbal theitu si.
Zumtu thlarau rawl thar ei ringring duh, Pathian thu thar thei ringring duhtu le pumpak nun tuaithar ringring a ṭulzia in zirhtu a si. Thazang laksal nun, tuaithar aw nun, Pathian thu thar ei ding hawl ringring nun hi zirding ṭulmi , Muvanlai nun a si.
3. Kiosa (Lion)
Kiosa cu ramsa lakih thunei le bawi tiah kawh a si ih, ṭihmi hrimhrim a nei lo.
Zumtu Pathian thu phuannak ah siseh, thudik phuannak ah ralṭha zetih dinpi ngamtu si hi zirding ṭulmi, Kiosa nun a si.
4. Sihte (Ants)
Sihte cu a caan te ah rawl an khawm thiam ih hmailam hrang an ralring cia thiam ih hlei ah an ṭangrual ih hna an ṭuantlang ringring ṭheu.
Zumtu midang thawn hnaṭuantlang ih hmailam hrangah taimak suah ih lungrualnak thawn hnaṭuan hi zirding ṭulmi, Sihte nun a si.
5. Sunṭam (Sparrow)
Suntam cu a tlangpi in bu an sak tikah Biakinn ah an sak ṭheu. Biakinn tlaihsantu sunṭam ti sehla kan sual lo ding.
Zumtu cu Biakinn tlaihsan ding le ngaina ding kan ṭul zet. Thinlung, Taksa le thlarau thazang kan lak nak hmun a si. Sunṭam vekih Pathian biakinn tlaihsan, ngainatu le a thleng ringringtu si ding ih in zirhtu cu, Sunṭam nun a si.
6. Vapual (Hornbill)
Vapual cu vate rinum asi ih duhdawtnak ah zohṭhimtlak le rinumnak thawn simtel ringring mi vate a si fawn.
Zumtu Pathian ah rinumnak nun nei in, lei parih nupi le pasal parih rinumnak nun neih ding a ṭhupitzia in zirhtu cu, Vapual nun a si.
7. Tuu (Sheep)
Tuu cu ramsa danglam zet a si ih khaltu ṭul ringring a si fawn. Lung neem le zaidam zet an si ih a burbur ih um khawmmi ramsa phun an si.
Tuu cu ramsa danglam zet a si ih khaltu ṭul ringring a si fawn. Lung neem le zaidam zet an si ih a burbur ih um khawmmi ramsa phun an si.
Zumtu cu in khal ringring tu Pathian tello cun zianghman ti thei mi kan neilo timi thei fiang ringring ih, thinlung tangdor ten Bawipa rinsan ringring kan ṭul zia in zirhtu cu, Tuu nun a si.
Ref: Rev. Joel Lalcungmang, "Nun Thlalang: 1st Edition", (Kalaymyo, 2020), p. 107-108.