Isaiah 40:30-31
30 Mino pawl hman an baang dingih, Tlangval khal an tha cem in an sawn ding. 31 Sikhalsehla Bawipa a rinsantu cu An tha a tlungsal ding. Muvalai vekin thlapharh in an zam ding. An tlan khallen an tha a baang lo ding; An feh rero khalle thacem in an sawn dah lo ding.
𝐓𝐇𝐎𝐌𝐀𝐒 𝐀𝐋𝐕𝐀 𝐄𝐃𝐈𝐒𝐎𝐍
10 Dec 1914 kum ah West Orange, New Jersey, USA ah Meikang nasazet a rak suak. Cetzung tum zetzet 10 lai a kangral theh ih cui a kang mi lak ah Meisa (Light Buld) rak tuahsuak tu Thomas Alva Edison Cetzung pi tla a rak tel ve. Nasazet in meikang cu an mit/thelh tum rero ko nan a alh lio sinsin. Culai fangah Thomas Alva Edison cu daiten a damsungih harsazet ih a ṭuansuah le a sak mi a cetzung a kang rero cu vawn zoh pah in a fapa Charles hnenah hitin a sim, "Ka fa, Na Nu le a hawipi/rualpi pawl tla vawn ko hnih, ra zoh hai seh. An damsung hivek ih Innkang maktara hi an hmu dah nawn lo ding," tiah a sim. Charles cun mak ti emem in Apa Thomas Alva Edison hnenah, "Ka Pa kan neih mi kan cetzung vutcam ah a cang rero na hmulo maw," tiah a let. A Pa Thomas Alva Edison cun,"Aw na sim mi a dik ka fapa, kan thil neih pawl a kang theh nan kan rak tisual le tuahsual mi pawl hmuahhmuah tla a kang tel cih ho khaw, thaizing ah a thar in kan thawk sal ding" tiah a let. A zanlam ah The New York Time reporter in an suhnak ah hitin a let hai,"Kum 67 ka si zo ih tuini thil thleng meikang mit/thleh kan tum nasa tuk nak ah ka bang in ka taksa tla a na ṭheh. Asinan thaizing thil tuah ding le dinthar salding tampi ka nei lai." a rak ti. A ti vek cekci in a thaizingah thiangfainak le dinthar salnak a nei ngaingai.
A liam cia caan ah harsa fualfo le mitsing ṭunto phah ten hmai kan nawr caan a um theu. Sunralnak, Buainak, Harsatnak, Elrelnak, hmuhsuam le Nautatnak pawl kan ton caan le innsangah, bulpak nun ah, kan hnaṭuannak khal ah thinpit le vansang in kan um caan a tam theu. Thomas Alva Edison cu kum 67 hnu ah a neihsiah a kangral theh ko nan dinthar hna a thawk lai a si ah cun kan nih ṭhalai pawl cu zuam sinsin ih beidong lo ten hmainawr ding kan si.
Kan tawnteh/paltlang mi pawl ih:
1. Kan hmuh daan in thleng sak
2. Kan nun daan in thleng sak
3. Kan ruah daan in thleng sak
Pathian a ṭihzah tu pawl cun Muvanlai bangih cak sinsin thazang lak ding kan si.
Zirding ummi kan zir pei ih, hlawn ding a ummi kan hlawn pei.
Tan ding ummi kan tan pei ih, dinthar le tuahṭhat a ṭul mi kan tuahṭha tlang pei.