Sam 37:3
Bawipa cu rinsan awla thil ṭha tuah aw. Cuticun hi ram sungah himdam tein na um ding.
Thusimtu 5:10
Tangka duhtu cu saduhthah in tangka a nei dah lo ding; Atlun ih Bible kan zoh tikah Pathian in amah rinsan le thilṭha tuah in fial ih hlei ah tangka lawnglawng a ruattu cun ziangzat a miat khalle a mal tuk a ti ringring ding. Cukhal cu zianghman lo a si!
Hebru 13:5
Tangka duh tuk hlah uh; nan neihmi ah nan lungkim uh. Ziangahtile Pathian in, "Ka lo tlansan lo dingih ka lo hnong lo ding." in ti.
A tlun ih Ca Thianghlim kan zoh asile, Pathian in amah rinsan ih thilṭha tuah in fial ih hleiah Supai duhtuk tu in saduhthah an nei dah lo zia le neihtawk teih lungawi thiam daan in simmi ka hmu thei.
Kuahlan lai ah; Milian zet pa in rualpi inn sakthiam zet a rak nei. Nikhat cu cui milian zet pa cun a rual inn sakthiam zet hnenah, "Ka rual (Inn sakthiam) ka lo rinsan ih ruangah paisa dollor $ 1,000,000 (1 Million - Dollar Ting 10) ka lo pe dingih na duhthusam rori in, Inn mawi le ṭhazet in saksak awla na ṭuanman tla ṭhahnem zet ka lo pe ding," tiah a fial. A rualpa (Inn sakthiam) cun pur zetin in sak nak dingah budget (hman ding) pawl a vawn ṭuat ih inn cu a lenglam in zoh tik ah mawizet si a sung thil ṭha lemlo ih kan sak a si le paisa tamzet a hlei ding tiah a ṭuat. Inn cu a lenglam lan daan mawizet in a sak nan a thilhman mi pawl cu thilri man ol tete hlir thawn a sak. Inn a sak ṭheh hnuah $ 500,000 lai a hlei ih cucu amah in a zal ah a san.
A rualpa hnenah Inn a sak ṭhehzo thu a vawn sim ih, a rual milian pa cun inn a zoh tikah mawi a ti zetih, a lung a awi ngaingai. Milian pa cun a rual inn sakthiam cu a ko ih, ka rual na hrang zianghman tuah sakmi ka nei hrihlo, curuangah himi inn hi na hrangah tiin na duh thusam rori in ka lo sak ter mi a si ti phah in inn cabi cu a pek.
Inn sakthiam pa cu a lu a dom ih,"Ka inn ding ti rak thei bang ta sehla ṭhazet le mawi zetin ka sak ding nan," tiin a sir awzet. Khua a rei vivo ih nisa le ruahsur cun a inn sakmi cu a nuai ciamco nak ah thilṭha ih tuah lo mi a inn cu a siar vivo ih a rem le a ben sal rero nak ah $ 500,000 hnak ih tam sawn a cem sal.
Ziangtinkim kan tuah kan ṭuan mihi ni khatkhat ah, kan mai hnenah a ra thlengsal ringring ṭheu tihi kan hngilhlo pei. Duhhamnak cun liannak hnak in neihmi umsun hman cemralnak ah a thlen thei a si. . Pathian in a Ca Thianghlim sungah duhham a ṭhat lo zia le thilṭha tuah ih a mah rinsan in duh zia tampi in sim vekin, Ziangtinkim ka tuah kan ṭuannak ah rinumnak le thilṭha tuah bansan hlah uh si.