NUPI PAWL IH THEIH ṬULMI (5)

1 Korin 7:3
Mipa in pasal a sinak ṭuanvo cu kimter sehla nunau khalin nupi a sinak ṭuanvo cu kimter ve seh; an pahnih in an ṭulnak fingfing ah diriamter ton aw hai seh.

Nupi/Pasal nei innsang din felfel zo kan si ahcun mai ṭuanvo cio kan nei ṭheh. Nupi in pasal parah le pasal tla in nupi parah tuah ding le ṭuanvo kan nei fingfing. Innsang nuam kan hmuh tinten kan daw ṭheu ko nan ziang ruangah timi cu kan sut aw dah lemlo. North America le Europe lam innsang tampi ṭhehawknak a suahtertu cu theihthiam awlo nak a si tiah zingzawitu pawl cun an hmusuak. Curuangah innsang ah theithiam awknak hi a thupizet a si.

Tui ka tarlang duhmi cu NUPI pawl ih theih ṭulmi tampi sung ihsin (5) te ka vawn tarlang ding.

1. Ngennak el lo a ṭha: Pasal in ihpi lo ngen tikah el lo a ṭha. Ih ding lawnglawng maw na ruat tiah pa pawl kan ti pang ṭheu. Damlonak ruangah maw, asilole remcanlonak a um a si khalle midang asilo ih mai duhdawtmi pasal a si ruangah ṭha ten simfiang ringring aw.
2. Kei cu nunau sawn ti hlah: Kei cu nunau sawn ka sisi ti men hlah, a ṭul dan ih zir in thok a ṭul cun nangmah in tla vawn thok mai aw, Pabik a lungawizet ding.
3. Ṭullonak ah ningzak hlah: Nupa cu felfai te ih neiawk a si ruangah, ihkhun parih ningzak awter ciamco kha a fuh lemlo. A bik tak in Nupawl hi ningzak vek ih um ciamco an hmang cuang ti a si. Curuangah nupa karlak ah ningzak ciamco a ṭullo ih pakhat le pakhat theithiam awzet tein nupa nun hmang tla innsang damnak le duhdawtnak karhtertu a si ve. 
4. Thil um daan theithaim/zohthiam aw: Nupi thil theithiam le zohthiam hi pasal hrangah a poimawh ngaingai. Abik tak in fanau vawn neih hnuah a thupi sinsin. Pabik khualtlawn a tlun caanah, "Pabik tla khualtlunnak in a ra tlungih faiten dai kan vawn bual ta ding" tivek tete tla theithiam a poimawh. Nupa nun hngettertu a si. 
5. Ṭongtam loin cangtam aw: Nupa fianrial zet ih nupa sinak hman laiah ṭongtam hnakin cangtam a fuh deuh. Mi-thi le ban/thuam pom vekih kei ka tello ti phun ih hmun dang rak zoh men tivek cu pasal pawl hrangih ruahnak (feeling) siattertu/paittertu a si.