Pawlkomnak ah siseh Kawhhran ah siseh, hruaitu kan si tikah meeting nak asilole tawnkhawmnak tete nei caan a tam phahphah ṭheu. Laimi cu hnihsuahsai nuam timi kan si vekin kawhhran meeting le pawlkawmnak meeting tivek tete ah khal hnihsuahsai phah in kan duhduh caan ah ra pok men kan tamzet ṭheu. Meeting ih kan ṭong dan le khawlai ih kan ṭong dan tla a bawngaw ih caan tampi ah meeting nak ah hlawknak thlentu si loin buainak suahtertu kan si pang ṭheu. Curuangah meeting nak ih theih ṭulzetmi pawl kan rawn taarlang ding.
Hruaitu Pakhat asilole Upa hruaitu na si ahcun:
- Meeting thok hlanah thlen a zuam ding.
- Meeting sungah mi thusim le thu umdan kha ṭhaten ngai ih theih zuam ding.
- Mai' ruahdan ih thu a feh lo hmanah thinsau in thu ṭha le ṭong neemten sim zuam ding.
- Ruahnak a hmunkhat lo ding ti theicia in midang ruahnak ziang siarloin um hlah.
- Meeting kaitu poh in an ruahnak thu sim theinak an nei cio ti hngilh lo ding.
- Mi tamsawn lungkimnak kha upat ih cohlan thei zuam ding.
- Thu pakhat rel laiah thudangah kaat lo ding.
- Thurel laimi theifiang loin na ruahnak sim hlah, telh hlah.
- Ṭhaten thungai awla a ṭhahnemmi ruahnak ṭha sim zuam aw.
- Midang in sim ko haiseh tiah tel lo vekin um hlah.
- Mee pek asilole thu khiahnak a um tikah a ṭhabik ih na ruahmi kha tuah aw, pe aw.
- Na ṭannak lam in a sun hmanah thintawi le mithmai sia in um hlah.
- Thu na sim duh tikah upatnak thawn "Chairman" tiah na ko dingih caan a lo pek le sim aw, nangmai thuten sim men hlah.
- Mi pakhat thu a sim laiah rak ding hlah. A ṭheh hnuah sim aw.
- Meeting pelh loin kai zuam awla, a ṭheh tiang na um ding, thu poimawhtuk na neih pang le chairman na sim hnu lawngah suak aw.
- Meeting laiah thu ṭha suah thei ding zuam awla, meeting ṭheh tikah na ṭong tam hlah.
- Mi in an lo theih hrih lole na hmin le na hnaṭuanmi sim hmaisa aw.
- Mi tamnak hmun ahcun thubur duh tikah to phah in sim men hlah. Ding in bur aw.
- Lungkimpitu cu to phahin ti theih a si.
- Na thubur a fiang lo asile ca thawn ngan awla secretary hnenah ap aw.
- Duhnak thu kaa ih na sim thiam lo ahcun ca thawn na sim thei.
- Meeting sungah na thin tawi terin thinheng hrimhrim hlah, ka palh thei ti theiaw cia aw.
- Thu na sim duh tikah duhdawtnak thinlung thawn sim zuam aw.
- Tawizet, fiangzet ih sim thei zuam aw. Mi zirh vekin sim hlah.
- Minung thawn meeting tuah asinan Pathian a tel ti hngilh hlah.