KAWHHRAN HRUAITU ṬUANVO

Kawhhran pakhat asilole pawlkawm pakhat ahcun hruaiawk cin le daan kan nei tlangpi ṭheu ti sehla ka sual lem ka zum lo. Caan tampi ah cin le daan siseh ṭuanvo ah siseh tuah ding le tuahlo ding kan theilo caan a um ṭheu. Cucun kawhhran ah le pawlkomnak ah buainak nasazet a suahter thei fawn. Kawhhran hruaitu pawl ih ṭuanvo mallai ka vawn tarlang ding. Himi hi thlun ṭheh ding le a dikbik tinak cu a silo. Ziangahtile kawhhran tin ih cin le daan, hruaiawk daan le feh-daan a bangaw cio lo ruangah a ṭha kan timi lak in kan hlawk pi ahcun ngan man a um zo.  

A. Chaiman Hnaṭuan

• Kawhhran sungih thuhla kaitubik a si.
• Pastor pawl thawn rem le nuam zetin hna an ṭuantlang pei.
• Pastor pawl thu a rawn ringring pei.
• Secretary le Treasurer thawn thu an ron aw ringring pei.
• Meeting hruaitu/hotu a si pei.
• Parliamentary Procedure awmang tawk a thei pei. 
• Thinlungṭha le ruahnak kau a nei pei. 

Meeting caanah: 

1. Meeting mawite le felte ih ṭheh thei a zuam ding.
2. Chairman cun a kaa in siseh, a mit in siseh a duhnak a langter lo pei.
3. Sim ve a duh a si ahcun Vice Chairman kha ṭuanvo a pek hnuah sim seh.
4. Vice Chairman a kian hnu ahcun thurel laimi a cem hlanah chairman a ṭuansal thei lo.
5. Mee a bawngaw a si ahcun chairman in thu thluknak a tuah thei.
6. Thu fehdan a sual pang asile a thu hram ah a kirsal ding.
7. Chairman cu meeting tuahdan ah thiam ding upadi (Cin le Daan) khal a theih phah a ṭul.
8. Chairman cu ṭihnung mithmai meng loin daihnak mithmai a neih a ṭul.
9. Thleidannak um lo tein mi mithmai zoh thiam a ṭul.
10. Mipi thinlung theih a zuam pei.
11. Thupi le thute a ṭhen thiam ding.
12. Chairman cu a thin a tawi lo pei.
13. Meeting kaitu ziangzat ti theih a zuam pei.
14. Meeting kaitu pawl lung thawhter a zuam pei.
15. Hnipuan ṭha tein a hruk pei.

B. Vice Chairman Hnaṭuan

Chairman a um lo tikah aiawhtu ding a si. Meeting tikah siseh, damlonak ruangah maw, tluksiatnak ruangah maw ṭuan zom thei nawn lo ding dinhmun ih a um tikah ṭuantu ding a si. A ṭuldan ih zirin an sawngawk thei dingih an bawmawk thei ringring ding. 

C. Secretary Hnaṭuan

Kawhhran sung hnaṭuan fel le fel lo thu cu secretary ah a hngat aw.

1. Calut, casuak a mai' kutah a um. 
2. Meeting thurelmi pawl fel tein a ngankhum thluh dingih report a pek ding.
3. Meeting sawmtu a si ding. A hmun, a ni-thla, a tikcu ṭhaten fiang tein a ngan pei.
4. Daan theih a ṭulih, a ṭulnak zawnah simfiang theitu si a ṭul.
5. Record cabu le meeting kaitu cazin a ret ding. 
6. Chairman thawn agenda an tawlrel ding.
7. Thurelmi pawl tlamtlin tertu a siih relmi vekin an ṭuan le ṭuan lo zoh fel ding.
8. Ziang kan rel ding ti rak ruatin a suahtuah cia pei.
9. Kawhhran sungih thil um, thil fehdan a thei dingih a ṭulmi theihternak a tuah ding.
10. Kawhhran sungih hnaṭuannak mipi hnenah a than peih a ngankhum pei.

D. Assistant Secretary Hnaṭuan

Secretary bawmtu cu secretary a um lo sungih aiawhtu ding le a um tik khalah a ṭuldan vek i bawmtu ding a si. 

E. Treasurer Hnaṭuan

Tangka hi Kawhhran hnaṭuannak ah buainak a suah theizet ruangah treasurer cu mifel le thluak cak a ṭul. 

1. Hman dingih relcatnak a um lawngah hmangin a pesuak pei.
2. Kumkhat sungih tangka hmuhmi le hmannak budget kha a thei ringring pei. 
3. Kawhhran sungih tangka hmannak a dik lomi a um a si ahcun miih mithmai a zoh lo pei.
4. Tangka um, hmandan, fehdan a ṭul tik pohah report a tuah thei ringring pei.
5. A hmannak lawng si loin ziangtin kan ngah dingih kan lalut thei ding tilam khal ruahcih a ṭul.
6. Hmannak Receipt pawl ṭhaten a ret ding.
7. Tangka lut-suak cazin feltein a nei pei.
8. Hmannak ding a um, a ṭul tikah zamrang tein a suah thei pei. 
9. Pathian sumpai kiltu ka si ti a thinlungah a pai in a pu ringring pei.
10. Cin le daan ih sianzat lawng a kut ah a umter pei ih amai' thu in midang a coih lo pei.

F. Deacon le Hruaitu Dangdang Hnaṭuan

1. Biakinn khawm tikah tonak remtu an si ding.
2. Pumkhawm tikah thilpek (Ahlu) an la ding.
3.  Bawipai' Zanriah hman tikah Pastor hnaṭuan an bawm pei.
4. Mipum cazin feltein an thei pei.
5. Thuthan ṭul ding a um asile mah le hnaṭuan cio ṭuanvo an lak pei.
6. Kawhhran sumpai, ṭhenhra ṭhenkhat target le ngahciami feltein an thei pei. 
7. Thawhhlawm kha ṭhatenin an siar dingih hminkhen thawn treasurer hnenah an ap pei.
8. Mah le vengih mi dam lo, thupoi a um asile Pastor an theihter pei.
9. Baptisma la ding an um asile ah fehpi pei.
10. Khawmnak ih a ra thlengtu pawl ra hmuak in an caangcawi pei.
11. Thuthangṭha karhzai theinak an hna ah ngaiin an zuam pei.
12. Khawmnak ih ṭulmi hna an bawm pei.
13. Kawhhran hruaikaiawk daan a ṭhanson theinak ding an tawlrel peiih an zuam pei.
14. Biakinn thleng dah lomi le dam lomi an veh dingih thlenter an zuam pei ih thla an cam sak pei.
15. Kawhhran thawn pehparawmi meeting kai pelh lo dingin an zuam pei. 
16. Pastor bawmtu le ruahnak petu ding an si.
17. Veng khawmnak ah an hruai ding.
18. Mipi hmaiah to in hruaitu lungput an nei ringring pei.
19. Mipi thlen hlanah biakinn an thleng ringring pei. 
20. Kawhhran hnaṭuan si loin Pathian hna ka ṭuan timi lungput an nei ringring pei.  

G. Auditor Hnaṭuan

Sumpai, thilri neihmi zate cazin cek ṭhehtu ding an si. Curuangah cathiam a si hmanah number ṭuatcak le cazin cek thiam a si tengteng a ṭul a si. 

H. Advisor Ṭuanvo

• Kawhhranpi Advisor cu Kawhhran ih rinsanmi kum upa, sinak nei, mithiam si thei sehla a ṭha sinsin. Asinan, sinak le degree nei tengteng ding tinak cu a um cuanglo. Mai local kawhhran ih zir in hril theih a si. 
• A tlang pi in Department pawlih Advisor cu Pastor, President, Secretary le upa dangdang pawl an si pei. 

1. Meeting caanah: Meeting ah ruahnak ṭhaṭha petu si dingah hrilmi an si vek in meeting tinten sawm le thurawn lak thiam ringring a ṭha. Department ih Advisor in thurawn ṭha le felfai a neih thei nak dingah cun sungthu a thei tengteng a ṭul.
2. Thubuai le Thu hnok: Buainak, thuh nok a um pang tikah ṭha te le tluangte ih a fehsal theinak dingah Advisor in ṭuanvo a nei. 
3. Thurawn pek: Ṭan lam nei lo teih thusuahpi le ruahnak pek a thiam pei. Advisor ṭan bul nei a si ahcun Department ah siseh Kawhhran ah siseh buainak ti fel si sawn loin buainak a suah pi sawn rianri thei. 

I. Meeting Agenda Tuahdan

Agenda hi chairman le secretary lole Pastor thawn tuah tlang ding a si. Agenda ih ca thawn ngancia ṭheh ding a si.

1. Hlasaknak, thlacamnak le thu tawi forhfialnak thawn meeting thok theih a si.
2. Pastor lole Chariman thusimnak in meeting thok theih a si.
3. Meeting thurelmi ngankhumtu ding hrilnak (Meeting picang deuhah hman a si ṭheu).
4. A ra mi Palai asilole upa hmin kawhnak (Meeting tum deuh ah hman a si ṭheu).
5. Meeting minutes hlun siarnak.
6. Ṭuan cia, Ṭuan hrih lo, ruahsal ṭulmi pawl relkhawmnak.
7. Hnaṭuan pawl report peknak Secretary, Tresurer, Department dangdang le sub-committee dangdang pawl hnen in.
8. Thuthar relnak, agenda tampi a um thei.
9. A ralai dingmi meeting caan khiahnak.
10. Meeting minutes siarsalnak le meeting cemternak cu hlasaknak le thlacamnak thawn bannak tuah theih a si.