Rev. Mike Zung Ceu
(FBCY Senior Pastor)
THUHMAIHRUAI
Greenville, SC Khuah ah CBANA consultation kan tuah. January 14-16, 2012 ah kawhhran (10) ihsin Pastor le hruaitu mipum (50) lenglo kan tongkhawm aw. Cuih ṭum ah thuburtu le thurelkhawmtu group pakhat ih hotu ṭuanvo ka co ve. Cumi consultation ih ka hmuhtonmi par ah Rev. Daniel Hrang Peng Ling ih forhfialnak thlun in hi cahram hi ramleng um Laimi Kawhhran pawl an ruahve dingah tumtahnak thawn ka ngan mi a si.
Ruah ding ṭha pawl:
- Laimi cu malte kan si. Asinan miphun dang hnakin Kawhhran (Pawl) a neitambik lam kan si. Kawlram ah ramlengbomnak ringlo ten mahke teih a ding thei le mission hna a ṭuantheitu Kawhhran cu malte lawng kan nei. Laimi cu mifarah kan si. Kanmah te cio cun Lai di-inn tete cu kan beuthei cio. Asinan innpi sak ding ahcun kan thazaang kan komkhawm awk a ṭul. Kawlram vek in ramdang ah laimi pawl kawhhran tampi ih kan ṭhenṭheh awk thotho ahcun kan miphun hrangah siseh, kan Pathian ram hrang khalah siseh, kan khua le ram ṭhansonak hrang khalah siseh, langhnganzet in ziang hman kan tuahsuak mi a um thei cuanglo ding.
- Hri le hram hngetkhoh kan neih a ṭul. Tahṭhimnak ah US ah hin Baptist ciocio hmanah Southern le Northern tiin an um. Hite buhnih hi pawlkomnak a neitheilomi an si. Curuangah pawlkom hngetkhoh (Organization Set Up) taktak fehpi kan duh ahcun kan hrampi ihsin kan bangrep a ṭul. Ziangahtile kan hrampi in kan hnaṭuan duhmi le kan ṭuanduhnak hmunlai a rel ding. Pawlkom menmen (Fellowship) ih um men hi tawk kan ti ahcun mai duhduhnak ih um men a theih. Asinan cumi in kannih Laimi kawhhran pawl hrangah ziangmi thilṭha le thilthupi a hringsuak thei ding ti nasazet ih ruah a ṭul. Hih thu ah kan tlaizo ti a um lo, kan thinlung in pawlkom hngetkhon a duh taktak ahcun rem theih lohli mi a siko.
- US ahhin "Hire"le "Fire"timi an uarzet. Laiṭong cun "Hlancopmi"le "Colhtertheimi"tiah kan tipei. Cumi cu company pawlin hmandeuh mi a si. Mirang kawhhran hrekkhat in an Pastor pawl parah hih ṭongkam an hmang. Laimi Kawhhran pawl khalin cumi ṭongkam hi Pastor pawl ṭemtawnnak ah an hmang tum ve. Kan lo "Hlancopmi na si"ih kan thuthu in na um ding, kan lo duh nawn lole "Kan lo colhter theimai" tiah ti an tumṭheu. A ngaingai cu kannih Laimi Pastor pawl cu Mirang Pastor pawl vekin Benefit (Insurrance le Pension tivek...) zianghman kan tuahsak theimi a um lo. Thlatinte hman khopkham in kan cawmthei cuca hrih lo tisehla kan sualtuk lo ding. Kawlram kan umlai ah Kawhhran thuhla theituk kan si ciolo thawn, mirang pawl ih daan ṭhalo cawngin zirnak a neimi Pastor pawl ziang siarlonak ih kan hman tikah kan Kawhhran ṭhanlennak in dawn khamtu ah a cangthei a si.
- Kawhhran ah "Thuneitubik hi zo a si?" kan tiṭheu mi hi thusuhnak ṭhalozet a si. Ziangahtile Kawhhran ah "Thuneitu" cu Jesuh lawng a si. Ṭhenkhat in "Deacon maw lal ding" asilole "Pastor?" tiah thu in sut ṭheu. Kawhhran ah "Ṭuanvo tamdeuh phutmi le maldeuh phutmi" tilawng a um. Kawlṭong in "Ṭa-wan-khan" an timi a si. Cumi cu mihnak in tamdeuh pumpetu ansinak kha a si. Rev. Dr. S. Hre Kio in,"1 Timonthy 3:1-7 ih Kawhhran hruaitu a timi hi "Pastor" a tinak a si. Himi ahhin Pastor lawng "Pathian ih Kawhhran kaihhruaitusinak (Management) ṭuanvolaktu ding a sinak a um ih, 1 Timothy 3:8-13 ih simmi Kawhhran bawmtu pawl ih hnaṭuan ah Kawhhran hruaitu sinak (Management) ṭuanvo peknak a um lo," tiin a sim dah. Simduhmi cu Presbyterian Kawhhran siarlo cu Pastor/Bishop ih kaihhruainak kha Deacon in ah bawm dingih mipi ih thluasuah peknak thawn Kawhhran cu a feh, a ṭhanglian vivo ding tinak a si.
- Kawlram ihsin ramleng ah a suaktu pawl lakah Pastor ṭuancia le Baibal tlawng a ṭhehzotu pawl khal antel ve. Cumi pawl sungah caantlingten Pastor hna a ṭuanta ih Kawhhran in pension pekhnu ah a ra mi, Kawlram ih Pathian hnaṭuan bansan in ramleng ah Pathian hna ka ṭuan sawn ding tiih a ra mi, Pathian hnaṭuan cu ka si thei nawnlo ih nuntu khawsaknak ka hawlsawn ding tiih a ra mi, Naingnganzi ruangah Kawlram ah um thei a sinawn lo ruangih ramleng a ra mi,...tivekin...thuhla a phunphun thawn ramleng ra mi an si. Cumi ah thupi mi le ruahṭulmi pawl cu: (a) Ordination (Reverance) ngah le ngah lo timi ah zo ih pekmi le nemhngetmi a si? (b) Kawhhran in ziangtin an Ordination hi kan pomsak theipei? Installation a ṭulta maw? (c) Kawhhran ah ṭuanvo neilotu biaknak lam Saya pawl le Kawhhran Pastor pawl ziangtin hna an ṭuantlang thei ding? Kawhhran dangdang ihsin rami tla kan si tikah Bawipa zanriah pekdaan, Tihnim pekdaan, ṭhit-umnak tuah daan,...tivek... kan bang aw lo phahphah mi hi ziangtin kan tuah ding? (d) Maih Kawhhran ah Pastor nei na koko in midang Kawhhran ih Pastor asilole Pastor hna a ṭuanlomi pawl sawm in ṭhit-umnak siseh, Innsang thlacam siseh, ruak vuinak siseh, thil dangdang kan tuah ṭheumi hi ziangtin Kawhhran in kan ruat ding? (e) Pawlkomnak hngetkhoh a neimi Kawhhran pawl cun "Ministers Council" neitlang in cuih "Ministers Council" ih cohlan theimi lawngin Kawhhran sungah "Pastor hna ṭuantheinak" neihter siseh ti a ṭha maw? (f) Biaknak lam Baibal tlawng pakhat le pakhat kan bangawk lo ruangah kan degree ngahmi pawl hi kan pompisak aw theipei maw? Ziangcin tiang kan pompi sak aw thei ding?
- Khristian daan thianghlim thawn ṭhit-umnak thuhla ah Cin le Daan ziangtin kan nei thei ding? Zung ah mai nupi a silomi le mai pasal a silomi hmin kan pekih rampidaan in nupi/pasal neilai ih ruahmi pawl Kawhhran in kut kah sihthei ding maw? Rampidaan ah fiangfaiten nupi/pasal neinawnlo sinak tuahta hna lawngah kutsihnak kan tuahsak a ṭha maw? Nupi/Pasal a ṭhentu pawl (Divorce) biakinn ah kutsihnak thianghlim tuah a theih maw? Inn ah thlacamnak men hi a tawkko law maw? Ramdang mi daanthlun in Living Together (Mahte umtlang) zo pawl cu kutsihnak thianghlim ih kutsih a theih nawn ding maw? Nunau le Nunau, Mipa le Mipa ṭhit-umnak kan pompi thei ding maw? Kut kan sih dingmi hi Kawlram/Ramdang ah Nupi/Pasal/Fate a nei le neilo ziangtin fiangfai ten kan theithei ding? Kawhhran in ziangvek cin lawng Marriage Certificate kan pek thei ding? Hih ṭhih-umnak thuhla ah Laimi Kawhhran pawl ziangtin bangran ten kan fehtlang thei ding? Kawhhran in pompi theilo ruangah kan Kawhhran Pastor in kut a sihthei lo mi kha midang Pastor in kut a sih tikah Kawhhran in cuih kan member pawl cu ziangtin kan ruat ding?
THUKHAIKHAWM
Laimi pawl ramleng kan pan caan a si bangin khuakhat, Kawhhran khat leh, pawlkom pakhat ah kan tongaw celcel. Laimi si fingfing hmansehla, kan ratnak khua le ram a bang awklo vekin kan thiamnak, kan hmuhton mi le kan duhdaan a bang awklo ruangah kan fehdaan a bangawk lonak tampi a um. Curuangah kan ralrin ṭulmi le kan ruah thuk ṭulmi tampi a um ding tihi hruaitu deuh pawl cun kan theih a ṭul. Hmailam caan saupi ih kan painhmang ding ruat in hruaitu pawlin kan mipi kan hruaithei le ke kan karpi thei a ṭul. Culawngah a hngetkhoh mi Kawhhran, a cakmi Pawlkom, mi ih ṭihzah upattlak mi miphun, Pathian ram a kautertu le khua le ram a ṭhansotertu miphun kan si thei ding a si.