Kawhhran ruangam asilole Department hi hmun hrekkhat ahcun Department ti loin Ministry tiah hman mi tla hmuh ding a tamzet. Tahthimnak ah: Women Ministry, Youth Ministry, CE Ministry, Evagelism le Mission tivek pawl tla an si. Department hi kan fiang theu lo tikah khat le khat theih sualawknak Kawhhran sungah a um pang thei. Deacon hi cu Department tiah kawh a si dah lem lo. Ziangahtile Deacons cu Admin tuanvo neitu bikah ruah a si ruangah a si bik. Kawhhran hrekkhat lala ahcun Department tluk fangin an ret an um thotho. Mah le local kawhhran ih dinhmun le ruahdan a thupi a si bik ko.
1. DEACON
Deacon timi cu Greek in Doulos an tiih a sullam cu "Sal" ti thawn a bawngrep. Kawhhran hrekkhat ahcun thuneitu bik, admin kaitu bik ah an ret ih Department pawl cu a teek/hnge tluk ah ret a si. A hmin sullam kan zoh tikah riantu timi thawn a bangawk vekin Kawhhran sungih Pastor le Member pawl hrangih riantu bik ding an si. Acozah lam uktu vekih thuneihnak, lalnak hmun ding cu a si lemlo. Department zate lungrual le rualran zetih zohtu, remtu, kilkhawitu ding an si. Pastor pawl ih hnatuannak tinkim ah bawmtu le tuantlangtu ding bik an si. Thimnak ah: Mi damlo veh, Bawipai zanriah, kawhhran sungih poitulnak tinkim ah tuantu ding an si. Kum ziat cin lawngin Deacon upa tuan theih a si pei? Kawhhran tum le fate umnak hmun le ram parah a thum aw ko ding.
2. WOMEN DEPARTMENT
Kawhhran tinah Nubu pawl hi paisa hawl theibik, tuan theibik, teima bik, kawhhran tungdingtu bik an si theu. Peknak ah, thlacamnak ah le pumpekawknak ah an pe aw thei deuh cuang theu. Pacang tha tluk vohvoh ruahnak, fimnak neitu tampi an um ve. Curuangah Deaconess (Deacon Nupi) tiangin hmun hrekkhat ahcun an hmang rero zo. Nubu pawlih cangvaihnak hin kawhhran in thluasuah tampi tampi a don phah theu. Kawhhranpi khalin dawnkham lam loin nasa zetih thazang pek ringring an tul. Kumtinte anmahten OB, EC, General meeting an tuah ve thei a tul. Nubu cangvaihnak ah faithaam, lungawibawm, ca-ik zem, talen, nikhat hlawh le a phunphun in sumpai an hawl theu.
3. YOUTH DEPARTMENT
Youth Department lamtawi in YD hi kum rikhiah fukfi cu an nei lo nan kawhhran hrekkhat ahcun fala le tlangval hlir an hmang. A tlangpi thu in Mino timi cu kum 40 hnuai hi a si deuh tlangpi. Youth ti tikah fala le tlangval lawng a huap lo. Pacang note, nupinu note tla himi Department ah telh theih a si. Youth Department hi cakvak ding bik le sumpai hawl theitu dingbik an si nan hmun tam sawn ahcun seherh tulbik ah an cang.
Ziangahtile khualtlawn caan, sumpai hawl caan le fim zir caan a si tikah tlaksamnak tampi a um theu. Hiti vek an si tikah mino thansonak ding hrangah Kawhhran in budget kan suaisak ding maw? asilole anmahten ziangtivekin sumpai an hawl thei ding timi cu ruahpi tlak zet a si. Media a phunphun in, thazaang suah ih mi hnatuan hlawh, talen, lungawi bawm, nikhat hlawh, bike kolh sak, puan sawp hlawh tivek in fund an hawl theu. Kumtinten OB, EC, le General meeting an neih tengteng a tul. Thlatin meeting tuah thei hai sehla a tha sinsin.
4. CHRISTIAN EDUCATION
Christian Education asilole lamtawi in CE hi Sunday School zirnak a siih, Zirhtu pawl kha CE Committee an si ding maw? Committee a hranten kan ret ding? timi ah ruah that a tul zet. CE thansonak ding ahcun anmahte lawng Committee si loin kawhhran sungih nauhak lam ngaihsaktu pawl kha Committee ah hril in ret thei sehla a tha. Cuih Committee cun zirhtu pawlih hnatuan dingmi le kekardan ding a khihhmuh ding. Cule zirhtu pawl anmahte ih meeting theinak khal on cih thiam a tul.
A tlangpi thu in zirhtu ah fala le tlangval lawng kan hmang theu. A thatnak zawn a um vekin a famkim thluh lo. Kawhhran sungih zirnak nei deuhmi, mahte ih study thate ih tuah theitu deuh tal cu hmang thei sehla a tha. Laica hman thate ih siar thiam tuk lomi kan hman tikah sambaunak tampi a um theu. Nauhak pawl hrangah hlawknak taktak ngah a har. Nauhak pawl hi Kawhhran hlunghlaitertu an siih hmailam hrang khalih hruaitu ding an si ruangah uluk zet a tul. Curuangah kawhhran in kumtin a tuahsak dingmi cu Camping, Crusade, Training a phunphun neih sak ringring a tul. Zirhtu pawlin anmah le tithei tawkten sumpai an hawl thei nan Kawhhranpi in budget suaisak an tul ringring. Department dang vekin General meeting cu tuah a theih lo nan thlatin meeting le kumcem meeting cu a tuah tengteng a tul. Cucu OB le Committee in fumfe zetih tawlrel a si theu.
5. EVANGELISM LE MISSION
Evangelism le Mission asilole lamtawi in E & M hin Nubu le mino vekin member hran a nei lo nan Kawhhran sung le leng ih mission hnatuannak le thuthangtha karhzainak ding hrangih tuanvo neitubik an si. Kawhhran picang deuh cun a hranten minung an hril thei nan Kawhhran tenau deuh ahcun Deacon 2, Mino 2, Nubu 2 le a dang 6 hrilin tuanter an si. Department dang vekin General Meeting tuah theih a si lo ding nan thlatin meeting le kumcem meeting cu tuah ding hrimhrim a si. Committee in a tuldan in sumpai hawlnak ah siseh, Kawhhran sungih hnatuannak dingah ro an relin an tuan thei.
Deacon upa ih tling deuh lo hril khawmmi kan si timi ruahnak um hlahseh. Kawhhran sungah a tangkai zetmi Department a si ve. Kawhhran him mission le evangelism a daithlang a si ahcun kawhhran a cak taktak thei lo. Local Kawhhran sungih evangelism, thangphawknak tuah hi a thupi zet. Home Cell, veng khawm (Bethlehem, Zion, Galilee, Jerusalem veng) ti vekin then in kawhmnak tuah a thupi ngaingai. Cuvek pawk kha E & M Department ih hoha ding a si.
Ziangmi Department kan tuan khalah a thupi bikmi cu Pathian hnatuan kan si ti theifiang hi a si. Deacon, Women Department, Youth Department, CE Department le E & M ah khal siseh riantu thinlung kan nei ahcun kawhhran thansonak kan suakpi tengteng ding a si. Kawhhran hruaitu hi Sinak le Lalnak vekih hman theih asilo ruangah kawhhran neitu taktak cu Jesuh Khrih a siih, Pastor, Deacon, Women Department, Youth Department, CE Department le E & M tivek pawl hmuahhmuah hi Pathian loram sungih a hnatuantu men fang kan si.
Pathian in a ram hrangah thuk sin, kau sin le sang sin in in hmang cio hramseh.